Aizawl: Land Revenue and Settlement (LR&S) B Lalchhanzova’n nimin khan mipui dawr theih turin Saitual DC Office (Revenue Branch) a hawng a. Revenue department chuan hna insemzai (decentralization) kalpui chu a tum ber a ni tih sawiin, file pawh a tlem thei ang ber dawhkan kal tlangtir an tum tih a sawi.
Hawnna inkhawmah LR&S Minister B Lalchhanzova chuan, revenue department dawr har tia mipuiin an lo sawi thin chu ‘kan fel tawh dawn’ tia an intuai thar mek tih sawiin, an officer te’n hetiang tawngkam an hmang chu ropui a tih thu a sawi.
B Lalchhanzova chuan minister a nih tirh khan miten ‘a theih loh ang’ an tih chu revenue administration siam that kha a ni a. Thawktuten ‘i ngam lo ang’ ti thin mah se, hun a lo kal a, pawn lam atanga mi sawi ang ngawt an lo ni lo va, a chhungah chuan hnathawh tak tak duh hlir an lo awm khawm a. Hma an la chho va, an hahzia te a hmuhpui a, dik lo taka nawr lui lo turin mipuite pawh a ngen tih a sawi.
Revenue office pui ber pawh Aizawl DC hmunah a awm thei dawn a, revenue administration hmangin hna insemzai an kal pui dawn tih sawiin B Lalchhanzova chuan, “File pawh a tlem thei ang ber dawhkan kal tlang tir kan tum. Thingtlang atanga revenue director hmuh kher te ngai tawh lovin district tina revenue office te hnenah thuneihna pek a ni dawn,” a ti.
LR&S minister chuan inrelbawlna felfai tak hnuaiah revenue department chu a kal chho zelin, district tin thuam chak an tum thu sawiin, “Hma bak la ko viau mah se, theihtawp kan chhuah zel dawn a ni,” a ti a. Department hrang hrangte chu thawhhona tel lo chuan hmasawnna a thleng thei lo tih sawiin, department hotute thawhhopuiah sawmin, revenue branch chu tangkai taka hmang turin Saitual District mipuite chu duhsakna a hlan nghal bawk.