Manchester United player panga chuan club chhuahsan an duh niin thawm a awm mek a, chhuah duh zingah hian England forward Marcus Rashford leh Argentina winger Alejandro Garnacho te chu an langsar hle.
Rashford hian Manchester United tan vawi 400 a khel tling tawh a. Manager Ruben Amorim chuan kum 27 mi hi a chhawr tam lo hle a, season hman zawh tak chanve vel kha Aston Villa-ah loan-in a khel nghe nghe a, Premier League-a vawi 10 a inlanah goal hnih a thun a ni.
Amorim chuan Rashford chu club tana inpe tawk lo tiin a puh a, mipui hriat turin, “Substitute bench-ah club tana inpe lo lutuk player thuttir ai chuan goalkeeper coach thuttir pawh ka thlang zawk,” a lo ti tawh a ni.
Aston Villa a zawm hnuah Rashford chuan kawng tam takah hma a sawn thu a sawi a, Manchester United chhuahsana hmun danga khelh a duh thu a sawi bawk.
Garnacho pawh Manchester United chhuahsan duh zingah a tel a. Kum 20 mi Argentine winger hi Europa League velah a inlan tha viau a, final-a Tottenham Hotspur an hneh loh khan hun tawp dawn lamah an luhtir chauh a, a lawm lo hle.
Garnacho chuan, “Final khelh hma kha chuan ka khel pangngai hle a, team tan pawh theihtawp ka chhuah a, ka tangkai ve hle chuan ka hria a. Final kan khel a, a tawp lam minute 20 vel chauh min khelhtir a, kha khan thutlukna thar min siamtir phah a ni,” a ti.
Jadon Sancho chu Manchester United chhuahsan duh dang pakhat niin, season hman zawh takah khan Chelsea chuan loan in an chhawr a, league-ah vawi 31 a khel a ni.
Kum 2022-a Ajax atanga Old Trafford pantu, Brazilian winger Antony chu chhuah dun zingah a tel bawk a, LaLiga club Real Betis-ah loan-in a khel a, vawi 17 khelin goal nga a thun a ni.
Dutch left-back Tyrell Malacia pawh Old Trafford chhuahsan duh zingah hian a tel a, February thlaah khan PSV Eindhoven chu loan-in a zawm a, hmun dangah bul tan that a duh thu a sawi ve bawk a ni.