Aizawl: Mizoram Legislative Assembly Speaker Lalbiakzama’n nimin khan Hmingchungnunga lehkha ziak, ‘The Reflection of Mizo Nationality: with special reference to Hmar Culture’ lehkhabu a tlangzarh.
Synod Conference Centre-a tlangzarh inkhawmah Assembly Speaker Lalbiakzama chuan khawvel huapa lehkhabu hlu leh darhzau ni tur chuan a ziahna tawng a pawimawh thu leh a hnam ang pawhin, saptawnga Mizo hnam chanchin ziahna lehkhabu chu hmasawn an ngaihna lam tak a ni tih a sawi a. Hun chep tak kara lehkhabu tha leh belhchian dawl tak mai ziak thei tura a ziaktu inpekna fakawm a tih thu sawiin, mite’n Mizo hnam chanchin an zir bing duh hun a lehkhabu tangkai tak a nih ngei a rin thu a sawi.
Lalbiakzama chuan a lehkhabu tlangzarh tak chu Zofate inpumkhatna tur leh khawvel ram tina Zofate chanchin a darh theihna tura lehkhabu tangkai tak a nih ngei a beisei thu a sawi bawk.
Lehkhabu tlangzarh inkhawm hi Global Mizo Council, General Headquarters Chairman JF. Rothangliana chuan kaihruaiin, Dr. PC Biaksiama’n lehkhabu thlirzauna hun a hmang a. A ziaktu, Hmingchunghnunga pawhin thu a sawi a ni.