Chelsea hi kil hrang hrangah hausa hle mah se hmatawngah an hausa tawk lo thin a, forward duhthusam an nei hlei thei lo. Hetih lai hian Joao Pedro chuan Pathiannia khelh tur Club World Cup final a thlenpui a, semifinal-ah ropui taka inlanin an lo zawn thin chhanna a ni dawn em tih zawhna a awm mek.
Brazilian hian kar hmasa maiah khan Brighton atangin Chelsea hi a zawm a, American neitu hnuaia kum 2022-a an awm hnuah hmatawng player 19 an lei tawh a, £ maktaduai 600 zet an seng tawh a, an duhthusam an la lei fuh thei lo.
Inrinnia Club World Cup quarter-final-a Palmeiras an hneh tumin a vawi khat nan a team thar tan a inlan hnuah Thawhlehni zanah semifinal-ah a naupan laia a khelhna thin, Fluminense hmaa a vawi khat nan bul tanin goal hnih tha zet a thun nghal.
Minute 18 a liam tihin Brazilian hian goal tha bik a thun a. A goal hnihna pawh second half-ah Enzo Fernandez-a’n halfway line bul atanga a pek luh atangin tha zet bawkin a thun leh.
Chelsea hian final an luh avangin £ maktaduai 21.9 an dawng dawn a, Nilaini zana Real Madrid leh Paris St-Germain chak zawk an hmachhawn dawn a. Final-ah chak lo mah se Joao Pedro-a goal hnih thun hmang hian a man hmun thuma thena hmun khat chu an hlawh chhuak dawn tho tho tawh tihna a ni.
“Mumang a ni ringawt,” tiin DAZN hnenah a sawi a. “Hei aia tha hi a awm thei lo. Ka goal hmasa ber ka thun kha ka lawm em em a. Club World Cup hi nomawi ka lak hmasak ber pawh a ni thei a, chawlhkar khat chauh ka la awm a, final ka khel dawn der a ni,” a ti.
Enzo Maresca-a team hian tun nipuiah pawh hian hmatawng an dap nasa a. Joao Pedro bakah hian Borussia Dortmund atangin Jamie Gittens, Ipswich Town atangin Liam Delap leh Brazilian teenager Estevao Willian te chu Palmeiras atangin an la tawh.
Brighton striker hlui hian kum 2023-a Watford atanga a zawm hnuah Seagulls tan vawi 70 khelhah goal 30 a thun a, a team tharah hian No. 9 leh 10-a khel thei tam tak karah hmun chan tumin a bei ve dawn.
Maresca-a team-ah a vawi khat nan New Jersey-a MetLife Stadium-ah bul a tan a. Brazilian hian vawi thum goal-a a petah vawi hnih a thun nghal a, Christopher Nkunku chiah a aia goal-a pet tam an awm lo.
Forward hian Blues tan a goal thun bakah goal nawrah a tangkai tih a lantir a, darkar chanve a la awma Nicolas Jackson-a’n a thlak hmain ball inchuhnaah vawi kua leh ball kang inchuhah vawi li hnehna a chang hman.
Amah aia khelmuala hun hman rei zawk ve ve, Nkunku leh Moises Caicedo te chuan ball inchuhnaa inhnamhnawih tam an awm a, Marc Cucurella leh Trevoh Chalobah te chiah ball kang chuh tam zawk an awm bawk.
“Goal thun ringawta teh theih pawh a ni lo,” tiin Real Madrid winger hlui, Gareth Bale-a chuan DAZN a hrilh a. “Mi dang nena inthlun zawmna, ball inpek, hmathlir neih leh kawng tinrenga khelh that a ni zawk. Tun hi a career-a a rahbi thar a ni a. Kawng dik chu a zawh nghal a, a kal zelnaah eng ang chiah theihna nge a neih tih kan la hmu zel dawn a ni,” a ti.
England forward Callum Wilson chuan, “Inringtawk tak a ni a; mahse, tha taka khel turin mamawh dang a la nei a, khelhna chan a duh a, chu chu zaninah hian kan hmu a ni,” tiin a sawi.