Aizawl: Mizo Students’ Union (MSU) chuan nimin khan Under Graduate Mizo Topper mi 24-te lawmpuina a buatsaih a, Environment, Forest & Climate Change Minister Lalthansanga’n khuallian niin a hmanpui.
Vana Pa hall-a inkhawmah khuallian Minister Lalthansanga chuan tunlai khawvel chu global village anga an inhlawmkhawm tawh avangin, an changkang tawh a. Ram changkang zawkte tih dan pawh entawn a awlsam tawh thu a sawi a. Chutihrualin, mahni hnam nunphung kalsan lo turin zirlaite a fuih.
Lalthansanga chuan hlawhtling tak tak tur chuan teirei peih a pawimawh tih sawiin, amah ngei pawh Minister dinhmun thleng tur hian kum 1993 atanga a beih tawh thu sawiin, teireina chuan hlawhtlinna a tawpah a chantir thin thu a sawi.
Inkhawma khualzahawm Mizoram Cooperative Apex Bank Chairman Lalnunsanga, MSU President B Lalkhawngaihzuala te pawhin thu an sawi.
Pass lawmpui zawng zawngte hi MSU-in pawisa fai leh citation an hlan vek a. Lalhmachhuana Zofa, MSU Senior Adviser hnenah Honoray Doctoral Degree a dawn lawmpuina thuziak an hlan bawk.