Mizoram Social Defence & Rehabilitation Board, Directorate of Social Welfare leh Working Committee on Ruihhlo Do-te tangkawpin ni hnih chhung awh an buatsaih, ‘Two Days Master Trainers’ Training on Drug Abuse Prevention for Women Church Leaders & Women Federations in Mizoram’ kharna hun chu nimin chawhnu khan Social Welfare Minister Lalrinpuii chuan khuallian niin a hmanpui.
Mi dang zirtir chhawng tura ruat kohhran hmeichhia leh hmeichhe NGO-te tana ruihhlo hman sual laka inven dan inzirtirna, I&PR Conference Hall, Lianchhiari Run-a kharna inkhawmah social welfare minister chuan ruihhlo do chu sorkarin policy-a a neih avangin he lamah hian ke a pen nasa dawn tih a sawi a. Mizoram hi chhan tlak a la awm avangin ruihhlo chungchang inhrilhhriatna leh ti chhin lo tura inven dan inzirtir tam a pawimawh thu a sawi bawk.
Inkhawm kaihruaitu, Social Welfare Director Dr. Lalhriatzuali Ralte chuan kohhran leh khawtlanga nihna pawimawh chelhtu hmeichhe kalkhawmte chu ruihhlo do kawngah nunna chân ngama tang ngam tur leh huaisen taka hmalam pan zel turin a chah.
Ruihhlo chungchang inzirtirna hunah hian kohhran leh hmeichhe pawl hrang hrang – Mara Chano Py (MCHP), Seventh Day Adventist, UPC (Mizoram), MHIP General Headquarters, Evangelical Church of Maraland, Central Kohhran Hmeichhia, Mizoram Baptist Kohhran Hmeichhe Pawl, UPC (NEI), Salvation Army leh Lai Women Association – aiawhte telin, pawl hmalakna, harsatna tawh leh hmachhawpte an sawi a. Ruihhlo do kawnga an hmalakna puih nan inkaihhruaina bu leh sum fai hlan an ni bawk.