Aizawl: ZPM chuan Chakma Autonomous District Council (CADC) thiah chungchanga Council of Ministers ngaihdan an thlawp tih an sawi.
Nimina thuchhuah an siamah ZPM chuan, July ni 8, 2025-a Home Minister K Sapdanga’n thu thar thehdarhtute a kawm tuma CADC thiah chungchanga Larsap-in a thiahna sut leh nise tih chu Council of Ministers ngaihdan a nih thu a sawi chu an thlawp tih an sawi.
ZPM chuan Constitution of India, Sixth Schedule Para 14 angin Governor hi autonomous district/region te inrelbawl dan zirchiang tur leh report pe turin Commission din phalsak a ni a, Commission report chu Governor recommendation nen state legislature-ah present tur a ni. Para 16(1) angin zirchianna behchhan hian autonomous district/region te inrelbawlna chu thiah (dissolve) emaw, inthlan that (fresh election) buatsaih theih a ni.
Para 16(2) anga CADC hi hna thawk thei lova buaina tawk emaw a ni lo a, Para 16(2) leh Para 20(BB) behchhanin floor test neih a ni hek lo. Supreme Court case [SR Bommai vs. Union of India (1994)] angin mipui thlan tlinten rorelna chang turin majority an nei em? tih hi executive-te ngaihdan ni lo vin, thlan tlin ten floor test hmanga finfiah tur a ni, tih a ni bawk avangin, larsap-in CADC a thiahna hi sut leh (revoke) ni se tia Mizoram sorkar Council of Ministers-in ngaihdan a siam hi an thlawp tih sawiin, rorelna fawng chelhtute ngaihdan tur dik nia an ngaih thu ZPM chuan an sawi.