Aizawl: New Delhi a cham mek Chief Minister Lalduhoma leh Robert J Ravi, CMD, BSNL te chu Mizoram House, New Delhi-ah nimin khan an inkawm a, Mizoram hmasawnna tur hrang hrang an sawi dun.
An inkawmnaah hian India ram khawpui lian hrang hranga BSNL-in ram awl neihah te MoU Mode a Mizoram House leh hostel sak dan tur te sawi dunin, chak taka hmalak zui ni se an ti.
Mizoram Village Council tina Optic Fiber Drop-In siam chungchang te, mobile signal la awm that lohna khuaa 4G Tower din belh chungchang te pawh an sawidun a. Zirlai ten awlsam zawka online exam an kalpui theih nan BSNL chuan Mizorama an telephone exchange tinah online exam center din turin Chief Minister hian a hrilh bawk.
Universal Services Obligation Fund (USOF) kaltlanga Multi Tasking Telecom Technician te hnena training pe tura hma lak dun theih dan kawng te pawh an sawi dun bawk.
Chief Minister hi R. Lalrodingi, OSD to CM chuan a tawiawm a ni.