Aizawl: Indian Red Cross Society – Mizoram State Branch-te chuan Disaster Management & Rehabilitation Department hnenah nimin khan blanket 300 an hlan.
Blanket inhlanna hun hi DM&R Minister Chamber-ah neih niin, DM&R Minister Prof. Lalnilawma chuan department aiawhin a dawng a ni.
DM&R Minister Prof Lalnilawma chuan Red Cross Society ten blanket an pe chu lawmawm a tih thu a sawi a. Red Cross Society chu mi harsate chhawmdawla, mipui vantlang hrisel nana thawk tu, khuarel chhiatna thleng thin leh mihring dikna chanvo inrahbehsaknate leh kawng hrang hranga chhiatna thleng thintea tanpui ngaite tanpui hna thawktu pawl an nih thu a sawi a. Mizorama Red Cross Society chawi nun leh thawmchak deuh deuh chu thil pawimawh tak a nih thu sawiin, Mizo mipuite tam leh zuala IRCS member-a inpe tura a duh thu a sawi bawk.
H. Lalengmawia, Managing Committee Chairman, IRCS-Mizoram State Branch leh Mizoram sorkar Health Department Secretary ni bawk chuan, IRCS member ni tur hian a duh apiang tan a tel theih thu sawiin, Life member ni duh tan membership fee Rs 500 a nih thu leh Institutional membership Rs 5,000 a nih thu a sawi.