Aizawl: Commerce & Industries Minister F Rodingliana chuan Export Promotion Industrial Park (EPIP), Lengte-a industrial unit hrang hrangte awmze nei zawka industry azira a hlawma dahkhawm/plot dan tur ruahmanna siam mek chu a enpui.
EPIP Lengte re-plotting hna hi Commerce & Industries Department leh Chief Architech, Mizoram PWD ten buaipui mekin, industry thuhmunte chu cluster khata dahkhawm tur niin, EPIP chhunga inkalpawhna internal road mumal zawka duan bakah power supply line mumal zawka zam dan turte ruahmannaah hian telh a ni.
P&E Minister ni bawk F Rodingliana chuan EPIP, Lengte chhunga industry te tan dedicated powerline siam dan turte enfiah nghalin, ruahmanna ang chuan Sihhmui Sub-Station atanga 11 kV line hmanga industrial unit-te chawm tur liau liau line kaltir tur a ni a, hei hi tihpuitlin anih chuan industry te tan power supply tha zawk leh regular zawkin a pek theih dawn a, tun dinhmunah domestic consumer line dangte nen la inthlun pawlh anih avangin line dang siamthat dawna industrial area chhunga shut down lak ngai thin chu pumpelh a ni ang a, industry-te pawhin an khawl regular zawkin an run thei dawn a ni.
Minister F Rodingliana chuan industry inangte hmun khata a hlawma dahkhawm anih chuan industry ek chhia (waste product) te pawh awmze nei a hman tangkai theih a ni ang a, raw materials te pawh a bo a bang awm lovin thil tangkai siam chhuah nan hman vek theih a beisei thu a sawi a ni.
Minister hian EPIP, Lengte chhunga hmasawnna hnathawh mekte bakah industrial unit te water supply mumal zawka pek dan turte a enpui nghal a, Luangmuala Industrial Estate a hmasawnna hnathawh mekte a en nghal bawk.