An kawppuite an then ve ve a, kum upa tawh lam mah nise an la intuaihnuam nalh peih si, Johnny Depp leh Angelina Jolie te inkarah ri ret ret a awm niin khawthlang lam media te chuan an chhuah leh tan tlat mai.
Mal leh khawhar taka awm hi mihring pangngai tan chuan a hrehawm a, phurrit leh lungngaih inchhawk tawn a, inpui tawn tura siam kan nih miau avangin anni pahnih sawi zawm hi a awm viau tho mai a, engemaw a thleng chhunzawm lovang tih a sawi theih loh.
Thuthang thenkhatah phei chuan an kawppuite an then hnu atang khan an inkar hi a tha tharin, a ruk takin an inzui chho leh tawh nia sawi an ni a, London leh Los Angeles lamah te pawh hun hmang turin ruahmanna an siam chho zel nia sawi an ni.
Angelina Jolie hi a pasal hlui Brad Pitt nen an inthen fel hnu khan ngaihzawng lamah a reh deuh deuh vang nghal a, a fate leh a chhungkua chu a ngaih pawimawh hmasak an nih thu a lo sawi tawh a; hetih lai hian Johnny Depp pawh hi a nupui hlui Amber Heard nen hmingchhe taka an inthen hnua reh zui ve deuh vang vangin, hetih hun lai hian a ruk takin an lo inhnimhnai hle tawh niawm an ni.
Anni pahnih hi kum 2010 a tihchhuah The Tourist-ah khan chang dunin, an inkara hmangaihna awm hi thuthang mai a la ni nain, khawthlang lam media te chaw tui tak pakhat a ni chho mek.