Aizawl: Chief Minister Lalduhoma leh HRDS India hotute chu Mizoram House, New Delhi ah an inkawm a, Mizorama mi harsa zawkte tana chenna in sak theih dan kawng an sawi ho.
HRDS India hian programme pakhat Sadhgraha an tih chu kalpuiin, tribal mipui, chenna in tha neilo te tana chenna in tur sak chu an pawl thiltum lian ber a ni a. Kum 2029 ral hma ngeiin India ram pumah tribal te tan chenna in nuai 100 din sak hman an tum mek.
Nilainia an inkawmnaah HRDS hotute chuan, Mizoram chhungah pawh zirchhianna an neihfel tawh thu leh phase I atan chenna in 5,000 vel sa tura hmalak an inpeih thu an sawi a. A tul angin a theihna zawnah hma a lo lakpui zel tur thu Chief Minister hian HRDS India hotute hi a hrilh a ni.
Chief Minister hi MP Richard Vanlalhmangaiha, Lalmuanpuia Punte, MLA/ Adviser to CM leh R Lalrodingi, OSD to CM ten an tawiawm.