Aizawl: Tun hnaia Myanmar ramria inkahna thleng avanga sahimna zawnga Mizorama rawn beltu, Champhai district chhung – Zokhawthar, Saikhumphai leh Vaphaia raltlante tan nimin khan Emergency Relief & Disaster Services, Salvation Army, India Eastern Territory (IET) chuan chhawmdawlna thilpek hrang hrang a hlan.
Salvation Army, India Eastern Territory team, Zokhawthara chhawmdawlna hi Col Lalliankunga, Cabinet Secretary for Programme Administration hovin raltlante tan buhfai quintal 10, dal quintal 8, tel case 15 leh chi quintal 1.5 te chu Zokhawthar YMA kutah an hlan a. Heng bakah hian sahbawn, sanitary pad, toothbrush leh tooth paste-te mi mal hnenah an sem bawk.
Nimin vek khan Major Lalhmingthanga, Social & Emergency Secretary hovin Vaphai leh Saikhumphaia raltlante tan chhawmdawlna thilpek hrang hrang- buhfai quintal 10, dal quintal 8, tel case 15 leh chi quintal 1.5 te chu Vaphai YMA kutah an hlan a. Sahbawn, sanitary pad, toothbrush leh tooth paste-te mi mal hnenah an sem chhuak nghal bawk.