June 12-a Gujarat-a Ahmedabad atanga London-a Gatwick tumhmun pana thlawk Air India thlawhna tla chhuina kal zelah report hmasa tihchhuahah a thlawh chhuah chiah khan a tuialhthei pekna chu tihthih (off) a ni tih tar lan a ni.
Mi 260 thihna thleng hi India-a Aircraft Accident Investigation Bureau (AAIB) chuan a chhui hna an thawha an thil hmuh an tichhuak.
Cockpit voice recording atangin a khalhtu pakhat zawk chuan a khawlpuia tuialhthei pek luhna off a nih chhan hi a zawt a, pakhat chuan a tih a nih loh thuin a chhang tih tar lan a ni.
Gatwick pan thlawhna hi Captain Sumeet Sabharwal-e leh co-pilot Clive Kundar-a te khalh a ni a. A tu zawk nge zawttu hi tih erawh la sawi a ni.
Flight recorder atanga an hmuhah thlawhnaa fuel control switch hi an thlawh chhuah atanga second reilo teah off a ni tih a hriat theih.
Switch-te hi thlawhna a tum fel hnua a khawl tihthih nana off chauh thin a ni a, a nih loh pawhin rikrum eng emaw a a thlena a khawl a kanin emaw off thin a ni bawk a, a thlawh chhuah laiin an off ngai lo.
Off a nih hian a khawlpuite hian hna an thawk thei ta lo thin niin AAIB-in an chhuina (preliminary) report an tihchhuahah an sawi a ni.
Fuel switch-te hi a nih dan tur pangngaia dah lehnghal chu a ni a, a nih tur angin a khawl pawhin hna a thawk leh thei nghal tur a ni a. Khawl pakhat zawk chuan a nih dan tur ang takin a hna a thawk leh thei nghal a; mahse, thlawhna kânpuina khawp a tling zo ta lo niin tar lan a ni.
A khalhtu pakhat zawk hian doctor zirlai leh thawk mekte awmna hmuna an tlak hma chiah khan an mangan thu a thawn chhuak hman a ni.
Report-ah hian thlawhna thlawh kawngah khan ‘tibuaitu sava che vel a awm lo’ tih tar lan a ni.
Report hi chhuina hmasa behchhana siam chauh a la ni a, “Tuna chhui chinah chuan B787-8 leh GE GEnx-1B engine operator leh a siamtute hnena rawtna leh an laka ngaihdan siamna tur a la awm lo,” an ti.
Federal Aviation Administration (FAA) chuan kum 2019 khan Special Airworthiness Information Bulletin a tihchhuahah Boeing 737 fuel control switch thenkhat hi buai a awm loh nan in-lock thei tura siam a ni tih report-ah hian tar lan tel a ni.
AAIB kaihhruaia thlawhna tla chhuinaah hian Boeing, General Electric, Air India, Indian regulator leh US leh UK-a mi thiamte an inrawlh mek a. A chhuina kimchang tak chu thla 12 chhung vela peih hman beisei a ni.
An thlawhna tlak chhan chhuina hmasa a chhuah hnuah Air India thupuangtu chuan report chu tha takin an dawngsawng tih a sawi.
“AAIB leh thuneitu dangte pawh chhuinaah hian kan pui zel a. A chhui hna hi zawh fel tak tak a nih hma chuan engmah kimchanga sawi theih kan la nei lo va, AAIB chhuinaah kan innghat tawp a ni,” a ti.
Ahmedabad-a thlawhna tla hi Air India tan chuan a pawi hle a, kum 2022-a Indian sorkar atanga Tata Group-in a lei hnuah in vawrh lar tuma nasa taka an beih mek lai a ni.
Thlawhna siamtu, Boeing pawhin AAIB-in an chhuinaa an hmuh an hrilh tawh thu leh UN International Civil Aviation Organization-in dan a neih anga an puih zel thu an puang.
US National Transportation Safety Board pawhin Indian thuneituten tha taka an thawhpui avangin lawm thu an sawi bawk.