Aizawl: Hulhliap Short Stay Centre thawh khatna ni 20 chhung awh chu zawh niin, a tawp thlengin camper mipa 105 leh hmeichhia 14 an awm.
Synod Revival Camping Center, Neihbawi a Mizoram sorkar, tlawmngai pawl leh Kohhran tangkawpin an buatsaih Hulhliap program-ah hian mumal taka ruihhlo avanga harsatna tawkte enkawl niin Core Committee Chairman Malsawmzuala Ralte leh Secretary Lalhriatzuali Ralte ten a hmun atang hian camp chhuakte an han thlah a. Mahni chhungte lamtu nei lo chu an kal tanna Bawngkawn YMA Hall leh Central YMA Office-ah te phurh thlen leh niin, heta tang hian a then an chhungten an lam a, a then mahni in an haw leh a ni.
Central YMA Office ah hian SW&WCD Minister Lalrinpuii pawhin lo hmuakin kawmna hun leh fuihna huntha tak a hmang a ni.
Tuna camp chhuakte hi anmahni duhthu in PISGAH Reformatory Center, Thingsulthliah ah mipa pahnih leh Shakti Sadan, Maumual ah hmeichhia pakhat an lut a. A bak zawng hi mahni ina lamah an haw a ni.
Hulhliap program hi camp chhuak ina hawte tan la chhunzawm niin, after care follow-up, psycho-social counselling hmangin volunteer psychologist leh social worker mi 40 rualin an vil zui ang a, thla thum chhung a tul angin an enzui dawn a ni.
Sorkar ruahman dan chuan hemi atanga damna change tan hian After Care Skill Training leh Handholding te tih chhunzawm tum a ni a. Hetiang tihna tur hmun remchang hi dap mek a ni.