July 5, 2025-a Myanmar-a Chin state, Falam district chhunga Zohnahthlak pawl pahnih sipai inkahna avanga sahimna zawnga Mizorama raltlan mi 3,500 chuangin an in leh lo panin an kir leh tawh.
The Zozam Times thudawn danin Myanmar ram chhunga Rih leh Khawmawi khuaahte Chin Defence Force (CDF-Hualngoram) leh Chin National Defence Force (CNDF) te nasa taka an inkah avanga sahimna zawnga Mizoram lam, Zokhawthara raltlante lut leh an khaw lama haw an awm reng a. CNDF-in CDF hmunpui, Khawmawi leh Rih an hnehchhuh chu Zirtawpni khan an chhuahsan leh tak avangin Inrinni zing lam atang khan raltlante hi an khaw lamah an let tan a ni.
Raltlante hi Mizoram an luh dawna uluk taka chhinchhiah an nih angin an khaw lama let leh raltlante pawh Mizoram Police leh Assam Rifles kaihhruaina hnuaiah fel fai taka chhinchhiah a ni.
Hriat theih chinah Pathianni thleng khan Zokhawthara raltlan mi 3,500 chuang an let leh tawh a. He chanchin buatsaih lai thleng hian 1,500 chuang Zokhawtharah an la awm a ni.
Zohnahthlak pawl pahnih sipaite inkahna avang hian Khawmawi leh Rihkhawdar atanga raltlan hi Zokhawtharah mi 4,000 chuang an tling hman a. A tam zawk hi haw tura beisei leh haw mek an ni a. Vaphai leh Saikhumphaiah raltlan mi 700 chuang an awm hman bawk.
Hetih lai hian Hualngo People Organisation hruaitute leh |iau Khawmawi hruaitute chuan CNDF sipaiten Khawmawia in an rawk leh bungrua bakah pawisa an rukte in-report turin mipui an hriattir angin Inrinni tlai dar 3 thlenga report-a a lan dan chuan, Khawmawiah in 12 rawk niin, India pawisa Rs nuai 19.1; Myanmar Kyat (Chiat) nuai 289; 125 Kenbo bike 21 rukbo niin, Khawmawi leh Rihkhawdara CNDF-te sulhnu hi la chhui zui zel a ni.
Thudawn danin CNA leh CDF-Hualngoram hotute chuan mipuite chu thlamuang taka awm tura hrilhin unau karah indona chhuak tawh lo se an duh thu an sawi a. Mipuite chu social media-ah pawh buaina tipunlun thei thil pho lang lo turin an ngen bawk.
CNDF-in CDF-Hualngoram hneha Khawmawi an awp hnuah he khua hi an chhuahsan leh tak avangin CNA leh CDF-Hualngoram sipaiten ramri gate-ah Chinland national flag an tar niin thudawnna chuan a sawi bawk.