India rama football hmanga inelna lian ber ni mek, Indian Super League (ISL) dinhmun a chiang thei rih lo chhunzawm zel a. Master Rights Agreement (MRA) chungchanga Football Sports Development Limited (FSDL) leh All India Football Federation (AIFF) ten inremna thar an la neih loh avang leh an nei thei dawn em tih pawh a la chian loh avangin 2025-26 season chu an khelh hun tur a la hriat loh.
ISL buatsaihtu, FSDL chu AIFF nen sumdawnna thuthlung ziak fel thlapa inkawp mek an ni a, kum 2010 khan kum 15 chhung atan thawh dunna thuthlung, MRA an ziak a ni.
MRA-ah hian ‘FSDL chuan AIFF hi kum tin Rs. vaibelchhe 50 an pe ziah tur a ni’ tiin an ziak a. Hetianga pawisa an pek hian FSDL chuan TV lamah inkhel an tichhuak thei ang a, India rama football enkawl te, sum lak luhna atana hman te chu an kutah a awm ang a, India national team thlengin an buaipui thei dawn a ni.
ISL season hi a tlangpuiin September thla atangin an tan a, April thlaah a zo thin a. Tuna FSDL leh AIFF inremna thuthlung neih mek hi kumin December thlaa tawp tawh tur a ni a, a tawp hun turah hian ISL chu thla thum vel an khel hman dawn tihna a ni ang.
AIFF-in 2025-26 calendar a tihchhuah khan ISL hi an dah tel ve lo a, hetiang a nih avanga ISL dinhmun chiang lo tih thawm rawn ri tan kha a ni a. Kum 2014 atanga an lo khelh tawh, tuna an telh lo chuan thawm a siam nasa a, mak tih pawh a hlawh viau a, tawp tawh tur anga sawi a nih nasat phah bawk a. Hetiang karah hian FSDL leh AIFF inkara MRA thuthlung ziah thar a awm loh thu hian a chhunzawm nghal a ni.
FSDL chuan December thla hnu lama awm zel dan tur sawi rik a awm miah loh avangin ruahmanna siam thei an nih loh thu an sawi a. Hetiang hi an dinhmun a nih avangin 2025-26 season chungchang ruahman te, sum hai luh dan tur ngaihtuahte chu an puitlin hlei thei lo niin an sawi a. Hei vang hian season thar tur chungchangah thutlukna siam thei an nih loh thu an sawi.
“December thla hnu lama awm zui zel dan tur ruahmanna pakhat mah a awm lo a, hei vang hian keini chuan kal zel dan tur duan te, 2025-26 ISL season tur ruahman, huaihawt leh sum lak luh dan tur kan ngaihtuah thei lo,” tiin thuchhuah an siam.
“Hetiang hi kan dinhmun a nih mek avangin 2025-26 ISL season kan la tan thei dawn rih lo a, MRA thuthlung a tawp huna awm zel dan tur tih chian a nih hma chuan hma kan la thei lo a ni. He thutlukna hi kan ti mai mai lo hle tih min lo hriatsak dawn ania,” an ti bawk.
FSDL hian ISL huanga chanpual neih dan tur ruahmanna an nei a, club te chuan 60% chang turin an duh a, FSDL-in 26% chang tur leh AIFF-in 14% chang turin an duh a ni.