Mizoramah district jail leh central jail kan nei a, tang thenkhat tlanchhuak thawm hriat tur a awm leh thin hi a pawi a, sorkar hian ngaihtuahna a sen deuh chu a ngai a ni.
District jail-a tangte tlanchhuak thawm hriat tur a awm leh zeuh zeuh thin a, a pawi tawh viau laiin central jail atanga tlanchhuak thawm hriat tur awm leh thin hi a pawi zual hle bawk.
Jail tangte hi thubuai rip tak tak nei, thenkhat phei chu pawisak nei vak lote an duh viau lehnghal a, mipui tan pawh hian a thlamuanthlak loh a, an panna kawnga awmte tan phei chuan a raltit zual thlak viau mai.
Kan jail hrang hrangte hi a tawt hlawm viau mai a, hmunhma zauh ngaihna awm vak lote a nih thin hlawm avangin sorkar pawh hian hmundang a zawn thuai thuai hi a tul tawh bawk khawp mai.
Ram ralmuang kan ni a, kan intihtheih viau laiin thubuai rip tak tak nei kan kawl ve reng tho a, jail tang tur hi awm miah lo thei ni ila duhthusam a nih laiin kan jail te hi a khat hneh thei viau hlawm thung si.
Sorkar hian jail tangte vil hneh tur thawktute hi lak belh nual thei se la, a nih loh pawhin hmun danga mi duty tur rip zawkin dah belh thuai se la, hemi chhung hian jail building tharte hi a ngaihtuah ran deuh deuh chu a ngai tawh bawk a ni. Jail tang tlanchhuak awm leh thin hi vei a hun tawh tak zet mai.