Aizawl: Karunya Institutes of Technology & Sciences, Coimbatore, Tamil Nadu-in an campus-ah zirlaite thlahna Convocation vawi 31-na an buatsaih chu Chief Minister Lalduhoma’n a hmanpui a, chief minister hi honorary doctorate degree an hlan nghal.
Convocation a hmanpuinaah chief minister hian, India rama zirna in tha tam tak hi Kristian te din leh enkawl an nih thu a sawi a. Zirna mai bakah hriselna, hnuchham enkawlna leh khawtlang rawngbawlna kawng dangah pawh, ram pum huapa mipui awm zat atanga tehin tlem hle mah se, Kristiante hian an thawhhlawk thin a. Karunya University pawh hi chutiang rilru pu chunga din leh kalpui a nih thu sawiin, India chhim lama University tha leh changtlung pawl tak a ni chho ta hial chu a chhuan thu a sawi.
Chief Minister chuan zirlai degree dawng thar zawng zawng te a lawmpui thu sawiin, an kal zelna turah duhsakna a hlan a. Karunya University in Honorary Doctorate Degree an pek chu an rawng a bawlsak mek Mizoram, ziak leh chhiar thiam vek chenna (fully literate state) ram mipuite aiawhin dawn a remtih thu leh, zirnain hmasawnna leh changkanna a thlen zel tih lantirnaah a ngaih thu sawiin, Doctor of Letters an hlan avangin lawmthu a sawi.
Convocation-ah hian Chancellor Dr. Paul Dhinakaran chuan zirlai hlawhtlingte hnenah medal leh certificate a hlan a. Vice Chancellor Dr. G. Prince Arulraj leh University mi pawimawh dangten thu an sawi bawk/
Executive Council of Karunya Institute of Technology & Sciences chuan chief minister Lalduhoma chu hmingtha taka khawtlang rawng a bawl thinna te, hmathlir tha tak nei ram hruaitu a nih vangte, remna leh muanna a awm theih nana nghing lo va a inpek thinna te, hmasawnna leh mipui sorkar dinna kawnga a hnathawh tha tak tak te avangin Doctor of Letters (Honoris Causa) a hlan a ni.