Aizawl: MJA General Headquarters chuan MJA member pahnih, tun hnaia Emmy Awards dawngtu HC Vanlalruata, Correspondent, The Times of India leh Isaac Zoramsanga, Copy Editor, Akashvani (AIR), Aizawl te hnenah lawmpuina a hlan.
Inrinni khan lawmpuina hlan inkhawm hi Aizawl Press Club-ah neih a ni a, MJA aiawhin MJA President C Lalrambuatsaiha’n HC Vanlalruata leh Isaac Zoramsanga te hnenah lawmpuina thuchei (citation) leh Rs 10,000 ve ve a hlan a ni.
MJA Vice President C. Lalhmachhuana kaihhruai inkhawmah hian MJA President C Lalrambuatsaiha chuan, HC Vanlalruata leh Isaac Zoramsanga te khawvel huap chawimawina dawngtute zinga an tel chu MJA-in a lawmpui tak zet thu a sawi a, “Mizoten journalism lamah rahbi pawimawh tak kan kai tihna a ni a, anni pahnih hian journalism lamah chuan thang an chhuah a ni ber a, kan chhuangin kan lawmpui tak zet a ni. India ram huap emaw, khawvel huap emaw chawimawina dawng thei journalist dangte pawh nei belh zel ila duhthusam a ni a, tan i la zel ang u,” a ti.
Lawmpuina hlan inkhawmah hian Emmy Awards dawngtu HC Vanlalruata leh Isaac Zoramsanga te pawhin thu an sawi a; MJA member eng emaw zatin lawmpuina leh duhsakna thu an sawi bawk.
BBC chuan documentary film ‘Myanmar’s Civil War’ tih hmangin Emmy Awards 2025 a dawng a, award dawnna hi Short Form Category-ah niin, ‘Outstanding Continuing News Coverage’ tih a ni. ‘Myanmar’s Civil War’ tih documentary-ah hian HC Vanlalruata leh Isaac Zoramsanga te hi Producer an ni.