Aizawl: Health Minister Lalrinpuii chuan Mizorama ruihhlo lut nasa chuan thil tha lo tam tak a ken tel thu leh HIV pawh a tihdarh nasat phah tih a sawi.
Inrinnia Mizoram State Positive Network (MSPN) tlangzarhna inkhawm Aijal Club-a neih a hmanpuinaah Health Minister Lalrinpuii chuan, HIV veite tan mahni dinhmun inpawm leh nunpui thiam a pawimawh thu leh, hmalam hun thlir thiam tura fuihtu an mamawh thu sawiin, hemi atan hian anmahni dinhmuna ding ve leh an tawn ang lo paltlang ve tawhte chu an tangkai hle thu a sawi.
Health minister chuan HIV hrik paiten ART tha taka an lak chu sorkar pawhin a ngaih pawimawh thu sawiin, a thlawna ART lak theihna Centre 14 chu ZMC&H, Kulikawn Hospital, Synod Hospital leh District Hospital tinah te buatsaih a nih thu a sawi a. HIV kaihhnawih natna dang laka an him theih nan leh mi dang an kaichhawn loh nan ART tha taka lak a pawimawh thu a sawi bawk.
Mizorama ruihhlo lut nasa chuan thil tha lo tam tak a kentel thu leh HIV pawh a tih darh nasat phah thu sawiin health minister chuan, Mizorama ruihhlo lut tur dan a pawimawh zia leh ruihhlo ti lo tura awareness neih a pawimawh thu a sawi bawk a. Sorkar chuan HIV darh zel tur ven leh inzirtir lamah nasa takin hma a la tih sawiin, hemi kawngah hian MSPN pawh chak zawka tan la turin a sawm.
Khualzahawm Mizoram State AIDS Control Society (MSACS) Project Director Dr. Jane Ralte pawhin thu sawiin, Mizorama mihring awm zat atanga chhutin (prevelance) HIV vei mi zaa 2.73 an awm mek tih sawiin, India ram puma a sang ber anih thu leh HIV vei thar (incidence) erawh kum 2018 atangin an tlem tual tual thu a sawi a. HIV hrik kaia inrinhlelhna nei an awm chuan inenchhin vat a pawimawh thu leh an positive a nih chuan ART tha taka lak a pawimawh thu a sawi bawk.
Inkhawmah hian MSPN member-te leh an hmalaknaa anamahni puitute hnenah khuallian leh khualzahawmte’n memento an hlan a ni.
MSPN hi Lalruatfeli’n kum 2021 khan a din a, kum 2024 khan Firms & Societies-ah an in register a. Mizorama HIV hrik paite an damkhawchhuah theihna turte, taksa leh rilru hrisel an neih theihna tur leh khawtlanga HIV hrik paite en hranna a reh theih nante hma an la thin a ni.