Tang tlan chhuak zawng mek AZL: Central Jail atanga tlan chhuak, Lianhmingthanga (36) leh Malsawmdawnga (28)-te zawn mek a ni.
Thudawn danin Inrinni zing dar 1:30 leh dar 2:15 inkar vel khan Lianhmingthanga leh Malsawmdawnga hi Central jail-a inthiarna (toilet) atangin an awmna ward ceiling-ah lutin, in chung rangva tikauin pawnah an chhuak a, hemi hnu hian bed sheet-ah thir kawm tawn betin security wall-ah an bat a, hemi hmang hian an tlan chhuak a ni.
Tang tlan chhuak an awm thu hi zing dar 2:15 khan jail vengtute’n an hria a, Zonuam Police Out Post-ah FIR theh luh nghal niin, Police-ten ngawrh takin an zawng mek a ni.
Tang tlanchhuak Lianhmingthanga, Thingsulthliah khua hi naupang kum tling lo pawngsual thubuai vanga POCSO Act case nei a ni. Malsawmdawnga, Farkawn khua chu Heroin man sak vanga ND&PS Act case a ni a, an pahnih hian thubuai la chinfel loh, court-a thubuai ngaihtuah mek an ni.