Lexington, Kentucky-a inkahna thlengah mi pahnih an thi a, police officer telin inkahna thlengah mi eng emaw zat hliam an awm bawk tih Governor Andy Beshear-a’n X-ah a tar lang a. State police chuan mi kaptu ber nia hriat hi a thi niin an sawi bawk.
Mi kaptu nia hriat hian Kentucky State Police (KSP) pakhat a kah hliam hnuah Richmond Road Baptist Church, Lexington-ah mi car chhuh luia tlanchhiain hetah hian hmeichhe pahnih a kah hlum bakah mi dang a hliam zui a ni.
KSP-in X-a an tar lan dan chuan inkahna hi Pathianni chawhma dar 11:36 (India-a zan dar 09:06) vela thleng a ni a. Officer a kah hnuah hian biak inah a tlan lut a, tharum thawhna dangin a zui ta a ni.
KSP trooper a kahna hi Blue Grass Airport, Fayette County a ni tih Lexington Herald-Leader chanchinbu chuan a tar lang a. Km 27 vela hla, Richmond Road Baptist Church-ah hian a tlan lut a, biak ina lo awm zingah hmeichhe pahnih, kum 72 leh 32 mi a kap hlum zui a ni.
“Biak in chhungah hian silaimu tuar dang eng emaw zat an awm a, emergency service-in an buaipui mek,” tiin KSP chuan a puang.
He chanchin ziah lai thleng hian hliam tuar zat leh an nat dan puanzar a la ni chiah lo va, thi pawh silai hmet puaktu ber tih loh hi chu an awm hriat a ni rih lo bawk.
Lexington Police Department (LPD) leh KSP officer-te chuan biak in hi a him tawh tih an sawi a. A kaptu nia an hriat hi tunge a nih puan a la ni lo va, engvanga hetianga che hi nge tih hriat tumin an chhui zui mek.
Chhuitute chuan a tuartute bakah a kaptu ber nia an hriat hi tunge a nih hriat tumin an bawhzui mek a, mi dang thawhpui a nei em tih pawh hriat an tum.
Kentucky Governor Beshear chuan silaia inkahna thleng leh tuartu an awm chu pawi a tih thu a sawi a, dan kengkawhtuten an hmachhawn dan chu fakawm a tih thu X-ah a tar lang.
“Engmah ngaihtuah chiang lova tharum thawhna thleng tuartute tan tawngtai ila, Lexington Police Department leh Kentucky State Police-in rang taka an hmachhawn danah an fakawm hle bawk,” a ti.
“Thil thlen dan kimchang hriat belh mek zel a ni a, puan theih a awm hunah puan a ni ang,” tiin governor chuan a sawi bawk.