Larsap Gen. Vijay Kumar Singh chuan raltlante tha taka chhinchhiah zel a tul thu sawiin, Mizoramin sum hnar a neih tam bik loh avangin nakkin zela khawtlang leh ramah nghawng tha lo a thlen loh nan inpuahchah lawk a tul tih a sawi.
Nimin khan Champhai district tlawha sorkar department hotute nen an thutkhawmnaah larsap chuan Champhai chu ramri kaltlanga drug tawlh rukna lian tak a nih thu leh drug hman sualin khawtlangah nghawng tha lo tak a thlen mek thu sawiin, “Drug do let kawngah tanrual a ngai a, a tawlh ru thinte man chhuaha an phu tawk hremna pek zel a tul,” a ti.
Larsap chuan Champhai district-ah PM-Kisan Samman Nidhi hamthatna dawngtu an tam chu lawmawm tiin Farmer Producer Organization (FPO) tam zawk din a tul thu leh organic thlai tam zawk thar chhuak thei tura hmalak a tul thu a sawi.
Rooftop solar scheme, bawlhhlawh sawngbawl, thlai thar sawngbawl bakah hriselna kawnga scheme pawimawh tak tak – Ayushman Card, Jan Aushadhi leh Health & Welness Centre-te chhawr tangkai thiam a tul thu leh, sikul leh Anganwadi-ahte ei tur hrisel chauh sem a tul thu te, khuarel chhiatnaten nghawng nasa zawk a thlen loh nana invenlawk thiam a pawimawh thute sawiin, hmasawnna hnathawh kawngah sorkar department-te chu thawhhona ngaipawimawh turin a chah bawk.
Thutkhawm zawh hian Larsap chuan Assam Rifles COB, Champhai tlawhin Brig Pushpendar Sorayan, DIG, HQ 23 Sector Assam Rifles leh hotu dangte bakah Mizoram Ex-Services Leaque (MESL) hotute a kawm a ni.