Star Entertainment buatsaih Miss Grand India 2025 thlannaah Mizoram aiawha tel, Vanlalnuntluangi, Thuampui, Aizawl chu pahnihna atan thlan a ni.
Miss Grand India 2025 thlanna hi July ni 4, 2025 atang khan Jaipur-ah tan a ni a, inelna hrang hrang neih a nih hnuah July ni 13, 2025 (Pathianni) khan a hmawr bawk fel a ni.
He intihsiaknaa pakhatna (Winner) atan Vishaka Kanwar thlan niin, 1st Runner up Vanlalnuntluangi, 2nd Runner up Nandini Patel, 3rd Runner Up Tsurila Jankhiungru leh 4th Runner Up Tancy Renu Pal te thlan an ni.
Mizoram aiawha tel Vanlalnuntluangi hian sub-title pawimawh tak tak pahnih – Best in Swimsuit leh Miss Social Media Queen a la bawk.
Vanlalnuntluangi hian kumin April thla khan online hmanga audition pein, Miss Grand India 2025 finalist atan thlan a ni zui ta a. Inbuatsaihna hrang hrangte kalpui chhoh nghal niin, a team member Amos Ms Dawngzuala, Paia Pachuau, Roa Hlondo, Daniel Chhakchhuak leh Isaac Lalremruata te nen nasa takin he intihsiakna atan hian an in buatsaih a ni.
Heng bakah hian designer tha leh hlun tak tak te a thawhpui bawk a, Paia Pachuau leh Daniel Chhakchhuak te’n Escape Engmoia kaihhruaina hnuaiah a National Costume an rawn duang chhuak a, Rose Pachuau, Tluangpuii Hmar, Fungki, Hannah Khiangte leh online shopping hlun tak Rent Little Miss te chu he intihsiakna atan hian a thawhpui a ni.