- Dr. C. Lalrampana
A KAMKÊUNA
Mizovin mithi kan inlênpui dan, kan intawrhpui dan leh kan insawngbawl dante hi intihtheih nan tak hmangin social media platform hrang hrang hmangin kan danglam bik dante leh kan tih that bikzia kan pholang fo thin. Hetihlai hian chanchin hlui leh ril zawk chhui chian chuan kan tihdan ang tho hian kum 1823 lai vel daih tawh khan America ramah khuan an lo kalpui daih tawh thin a, mahse, hun a lo kal zel a, mihring khawsak changkang zel leh hriselna lam thu ngaihtuahin an tihdan hlui, khawhar in inlenpui, intuarpui leh mithi sawngbawl dan hrim hrim pawh chhuan thar rilru mil zawng zelin a lo inher danglam ve ta zel a ni. Hetiang deuh hian keini pawh hian zir tur kan nei ve a, chungte chu hetiang hian thlir teh ang:
RUANG KIL TAWH LO ILA?
Thih hnua kan inlainatzia lantir nan mithi ruang kan kil thin a, mahse, hei hi hriselna lam thu ngaihtuahin bansan a hun tawh mai thei. A chhan chu mitthi ruang hnaiha awm leh kuta chul leh pawm/dawm/kuah thin hian mithiin natna hrik a kai tawh, a thihpui tawh nena inchiahpiahna tha lo tak a nih avangin a tha lem hle. Hei hian, inkaichhawn theih natna hepatitis B leh hepatitis C, HIV, ril natna (EIP), tuihri, TB leh a dangte pawh a awm thei a ni. Mi a thih hnuah a taksaa chemical lama inthlak danglamna hrang hrang a thleng a. Chung zingah chuan a taksa khawng (rigor mortis) thisen khang (livor mortis) leh taksa vawt/dai (algor mortis)-te pawh a tel. Tin, a tawih pawh hi bacteria tissue a tichhia a, uih (gas) a chhuah a, rimchhia a chhuah bawk. Hei vang hian hnam fing zawkte chuan mi an thihin damdawi ina mithi dahna hmun (mortuary home)-ah dahin thlanmuala vuina hun hman hma chu an dah mai a. Vui hunah thlanmualah hun hmangin, an phum mai thin. Hetiang hian tih ve a hun tawh hle niin a lang. Ngun taka ngaihtuah chi a ni.
MITHI CHHUNGTE TANA THILPEK:
Mi an thihin kan uizia leh tawrhpuizia lantir nan buhfai, tangka, puan leh pangpâr etc. kan pe thin. Hei hi mithi chhungte’n an hnemhnânpui hle thin. Hetih rual hian abik takin pangpar inpek hi bansan thei tawh ila a tha hle. Pastor pakhat mithi vuitu chuan-”Pangpar inpek hi tha viauvin lang mah se, tangkaina vak a nei lova, a tawpah chuan hnawksak mai a ni; chu ai chuan a pawisain inpe thin ila mithi chhungte pawhin an tangkaipui zawk ang” tiin a sawi a, a dik khawp mai. Mizo Officer lian tak pakhat chu a thi a. Mi pawimawh tak a nih avangin CM leh a cabinet-te leh midang dangin pangpar an pek chu a tam lutuk a, tar theihna zawng zawnga an târ hnuah pawh dah ngaihna an hre lo chuan thing rem lianpuiah an khung khawm a, kum 10 chuang an dah hnu pawhin paih an la ui bawk si, a hnawk tawh bawk si, an manganpui hle. Heng pangpar zawng zawngte hi man to tak tak an ni a, pakhat pawh ?. 1,000-2,000 vel lo ni ta se, a pawisain han pe ta zawk se a van chhenfakawm dawn tehlul êm! Chuvangin, Pastor sawi ang khian lusun kan intuarpuina leh intanpuina atan hian pangpar inpek uar ai chuan a pawisain pangpar man hu ?.500-1,500 thleng pawh inpe mai thin ila lusun chhungte pawhin an tangkaipui zawk ngei ang.
MITHI PUANA TUAMNA :
Chhungkhat Hnai vai deuh leh thian tha ngaimawh zawngte an thihin puana tuam kan ching thin. Hei hi chu pangpar ai chuan a tha zawk fe niin a lang. Hei pawh hi pawisa faiin thlak thei ila chuan a hlu lehzual ngei ang. Mahse, a thia-te hriat reng nana kan han insemdarhlehte hi chu a hluin thatna lai tam tak a awm. Mahse, hei pawh hi bansanin tangka faiin thlak thei ila chuan a la hlu lehzual ang.
A TLÂNGKAWMNA
Thihnia kan intuarpui dan leh tanpui dan zinga kan thlak ngai leh tihdanglam ngai ve tawh nia tha leh pawimawh tarlan takte bakah khian vuina hun serha kan intawiawm dan pawh hi a kal tur zat bithliah theih ni se a tha hial ang. In chêp, hmun rem lo, kilkhawr leh zim lutuk hmuna inchhunga leng lo, step leh kãwmkar chep lutuka nisa/ruahsur hreawm tak hnuaia lehkhachhia phaha kan thu nghuk mai thinte hi lusun chhungte tan lawmawmin hlu hlein lang mah se, thutna chang lo mipuite tan rilru leh thinlung lairil taka intawrhpuina rilru a dalin a dava zo vek thin a; lusunte tan pawh a hlutna a tlem hle thin niin a lang. Chuvangin, lusun chhungte in leh hmun hma mila vuina hunserha tel tur chin bithliah dan hi ruahman theih ni se a tihzia ngawt ang. Heng kan han tarlan takte hi sawrkar hmlakna chi a ni lova NGO lian ber YMA te ngaihtuah tur leh tihtur chi a nih avangin tlawmngai pawl lian ber YMA hian bengsika ngaihtuahin hma thar la thei se a lawmawm ngawt ang.