Rela chuangte himna atana beihpui thlakna chi khat atan Railway Minister Ashwini Vaishnaw-a chuan rel veivak tam zual pindan 74,000 kawngka bulah CCTV camera dah vek tura rawtna chu a pawm tih thuneitu sangin Pathianni khan a sawi.
Rel pindan kawngka bula CCTV camera dah hian a chuangte himna tur a thlen dawn bakah tute emaw rel chuang tibuai leh mi sual pawlin khawsak pangngai lova khawsak an tumna tam tak a veng thei dawn niin sawi a ni.
Northern Railway hnuaia loco engine leh pindanah CCTV camera hi enchhin nan dah chhin a ni tawh a, a tangkai hle tih hmuh a ni tih thuneitu chuan a sawi bawk.
Vaishnaw bakah Minister of State for Railways Ravneet Singh Bittu leh Railway Board-a mi pawimawhte chuan Inrinni khan CCTV camera vuah chhinin nghawng a neih dante en hian an thukhawm a ni.
Union minister chuan enchhinna hi a hlawhtlin em avangin pindan 74,000 leh loco 15,000-a kawngka bulah zel CCTV camera dah vekna tur chu a titlu ta a ni.
“Rel pindante hi dome-type CCTV camera pali – a luhna pakhatah pahnih zel hmang vil a ni ang a, locomotive tinah CCTV camera paruk dah a ni dawn bawk a. Heng hi a hma, a hnung leh a sir ve veah pakhat theuh zel dah tur a ni a. Loco-ah hian a hma leh hnungah dome CCTV camera ve ve dah a ni ang a, a sirah desk-mounted microphone awm vuah a ni bawk ang.” tiin thuneitu chuan a sawi.
Vaishnaw-a hian railway thuneitute hnenah hian camera an vuah turte chu tha tak, darkar khata km 100 chuanga chaka rel a tlan lai leh eng that lohna hmunah pawh chiang taka che vel thla la thei vuah turin a ti bawk.
Railway minister hian thuneitute hi CCTV camera-in thla a lakte chu IndiaAI mission nena thawkhova AI thiamna hmanga tha zawka tih thei dan dap turin a ti bawk.
Sorkar thuchhuah chuan rel veivak nasa zual, miin an hman rim zuala camera dah hian a chiangte himna tam tak a thlen dawn niin tar lan a ni a. Hetih rual hian mi mal thil pawh a lak tel dawn avangin fimkhur a ngai dawn tih an tar lang tel.
Indian Railways hi hmangtu an tam avangin tihchangtluna a chiangte himna, chuan awlsam leh mi tin banphak a nih theihna turin sorkar chuan hma a la reng tih thuchhuahah hian tar lan a ni bawk.