Sikh sakhaw zuitute hmun thianghlim ber, Punjab khawpui, Amritsar-a Golden Temple thuneitute chuan bomb tihpuaha vauna an dawng tih thuneituten Thawhtanni khan an sawi a, bomb disposal squad tirh nghal an ni.
Sikh sakhuaa rorelna sang ber, Shiromani Gurudwara Prabandhak Committee (SGPC) chuan e-mail hmanga Golden Temple-a langar hall (community kitchen hall), Darbar Sahib an tih bawka bomb tihpuah tuma tihthaihna an dawn hnuah police-ah an thlen nghal.
SGPC chief Harjinder Singh Dhami chuan police-in an chhui zui mek a, officer lawk rualin a hmunah an awmchilh bawk tih a sawi a. “Thil thui tak sawi theih kan la nei rih lo,” tiin Thawhtanni zan khan a sawi.
Amritsar Police Commissioner Gurpreet Singh Bhullar pawhin SGPC-in tihthaihna an dawng tih an thlen angin thubuai an ziak lut a, an chhui zui nghal mek tih a sawi.
Punjab Police-a cyber crime wing-in e-mail chu tu thawn nge, khawi hmun atang nge tih leh a kaihhnawih thil dang an um zui mek bawk.
Hetih lai hian Amritsar MP Gurjeet Singh Aujla-a pawhin Golden Temple-in tihthaihna a dawng tih a hriat veleh che chhuak nghalin Chief Minister Bhagwant Mann-a a bia a, a rang thei ang bera hma la nghal turin a ti.
“E-mail hmangin Sri Harmandir Sahib (Golden Temple) chu RDX-a bomb-ah vau a ni a. Sakhaw hmun hetianga invauna hi chu intihthaihna satliah a ni mai lo va, muanna, rinna leh mihring nun dan beihna a ni tel a ni,” tiin parliamentarian hian X-ah a tar lang.
“Pu Bhagwant Mann leh DGP Punjab pawh rang taka che chhuaka na taka thil kalpui turin ka ngen nghal a. He hmun hi hmun thianghlim, pathian be tura mi nuai telin ni tin an tlawh thin a ni a. A himna hi kan ngaihthah thiang lo va. Department tin inringin intelligence leh a vennaah engmah tihpalh a awm kan phal tur a ni lo va, he hmun hlu hi a himna turin kan tanrual a ngai a ni,” a ti bawk.