Aizawl: Mizoram State Project Monitoring Committee chuan nimin khan Thenzawla Solar Plant panna kawng an endik a. Kawng leh side drain chhe tawh siam that ngai leh hmalakna tur hrang hrang chungchang an sawiho nghal.
MSPMC team chuan hnathawh an endikna atanga an hmuhdan te chu MSPMC Chairman, Chief Minister ni bawk Lalduhoma hnenah an theh lut dawn tih sawiin, Mizorama project hnathawh hrang hrangah quality control an ngaihthah thin avangin hetiang lam hi ngaih pawimawh ni thin se an duh thu an sawi.
Inkawmhonah hian Vantawng Group YMA leh a hnuaia Vigilance & Monitoring Sub-Committee hruaitute pawhin thu sawiin, Solar Plant panna kawng chu tun aia tha zawka siam leh ngei ni se an duhthu an sawi a; P&E department hotute pawhin kawng thalo chu siamthat a nih theih nan an ngaihven zui zel dawn tih an sawi bawk.
Thenzawla Solar Plant panna kawng endiktu te hi MSPMC member Er. H.Laldintluanga; MSPMC Task Force Vanchhungi, Vannunmawia, P.S to Vice Chairman, MSPMC-te bakah PWD Quality Control & Research Devlopment Division Technician-te an ni a. Er. Laltlanthanga, Chief Engineer, Distribution, P&E department bakah thawktu dangte bakah, Vantawng Group YMA hruaitute, Vigilance & Monitoring Sub-Committee hruaitute leh chanchinbumi te an tel bawk.