Ruihhloin nasa takin min run a, a kalkawnga awm kan ni tia mithiam zawkten an sawi miau avangin man tur a awm reng a, man sen loh tam tak a ti thinten an inchuh zui bawk.
Hetiang taka tam a nih avang hian a ti thinte pawh an tam telh telh a, inthup reng an tum tawh lo a, ruihhlo an hmuh theihna tur a nih chuan tih hreh leh insum an harsat a, Aizawl khawpui lunlaiah pawh ngampa takin an thle bawk bawk ngam ta.
Hei tak hi a veiawm a, hmuh a hrehawm a, naupang zawkte hmuh atan phei chuan thil mawi a ni hek lo. Aizawl khawpui lun laiah pawh an tleh dul dul ngam tawh a, khaw en laiin an ruihhlo zawng an inzui dul dul ngam tlat tawh.
Khawpui lailia awm Assam Rifle chhuahsan hmunte hi ruihhlo tihna khawpui tenau a ni ringawt tawh a, zan lam leh chhun lamah anni ho teihawina khawpui tenau a ni ringawt tawh mai a, vei a hun hle.
Ruihhlo tawlh hi a tawp thut dawn lo a, mahse a ti thinte heti taka ualaua an awm ngam ta hi tih reh kan tum tur a ni. Thapui thawh ila, nunau leh thalai zawkte, a ti ve miah lohte hmuh laia khawpui lailia khaw en laia an meng chiai chiai maite hi hnawhbo a, tih rem i tum ang u.
Sorkar hi a hmala theitu rang ber chu a nih hmel a, heng mite hi ram hmel tibaltu, kan khawpui titawptute an ni a, kan thianfai thuai a nih loh chuan ramdang kan ang chho thuai mai ang. Vawiin atang hian chet la teh ang u.