Aizawl: Kumin kum tawpa Red Bull-in Aizawl-a mountain bike intlansiak (Urban Downhill race) an buatsaih tur chungchang ngaihtuahin nimin khan Sports Minister Lalnghinglova Hmar hovin sorkar department aiawh leh khawtlang hruaitute an thukhawm.
Thutkhawm kaihruaitu Tourism Minister ni bawk Lalnghinglova Hmar chuan Aizawl Tlang Ruam chu kuminah lian zawk leh huamzau zawk, intihsiakna kalkawng pawh harsa leh thui zawk a buatsaih tum a nih thu a sawi a. Tlang Ruam chu India leh khawvel hriatah a tha zawnga Mizoram pho chhuahna remchang leh pawimawh tak a ni a, sports intihsiakna a nih piahlamah mipui tan intihhlimna, mi tam tak tan eizawnna siamtu leh tourism-a hmasawnna thlen theitu ni bawk a nih avangin, lian leh ropui zawka ti tur chuan theihtawp chhuaha tangrual turin a sawm.
Thutkhawmah hian Tlang Ruam event kaihhnawih sorkar department hotute bakah intlansiak neihna hmun tur Upper Republic, Republic, Republic Vengthlang leh ITI veng Local Council aiawh te, Mizoram Cycling Association leh Red Bull India aiawhte an tel a ni.
‘Aizawl Tlang Ruam 2025’ hi November thlaah neih tura ruahman niin, Upper Republic atanga ITI kawn thleng tlan tura ruahman chhin a ni a. Intlansiakna kawng piahlamah media coverage leh inbuatsaihna dang te pawh international standard vek a kalpui tum a ni. Event pumpui hi Jio TV kaltlanga live a pekchhuah tum a ni bawk.
Khawpui chhunga mountain bike intlansiak, ‘Red Bull Aizawl Tlang Ruam’ hi October 26, 2024 khan a vawi khat nan hlawhtling taka buatsaih a lo ni tawh a, Asia khawmualpuia Red Bull buatsaih Urban downhill mountain bike intlansiak hmasa ber a ni nghe nghe.
Nikumah khan mi 22 intihsiakin, cycling khawvela mi langsar pahnih – Tomas Slavik (Czech Republic) leh Pedro Burns (Chile) te chu mentor niin an tel bawk.