Mizoram hi hnam dang sumdawngin sum leh paia inrelbawlna kawnga an chim ral loh nan trade licence dilte hnena ILP phut a nih dan chungchang zirchianga hma la tur leh hnam dang contractor-ten Mizorama hna an thawhin GST kim taka an pekna turin hmalak rel.
Thawhlehni chawhnu khan Central GST Commissionerate huaihawtin Mizoram Merchant Association (MIMA), Mizoram Road & Building Construction Association (MRBA), Mizoram Chambers of Commerce & Industries Association hruaitute leh GST khawih thin firm thenkhat an thukhawm.
CGST Conference Hall-a Central GST Commissionerate, Joint Commissioner Malsawmtluanga kaihhruaia thutkhawmah hian India ram hmun hrang hrang atanga GST registration dilte chu Central GST Commission-in ILP phut lova an lo ziah luh thin chungchangah Mizoram hi hnam dangin economic-a an chim ral loh nan Bengal Eastern Frontier Regulations, 1873 zulzuiin ILP inkaihhruainaah trade license dilte hnenah kum hnih chhung ILP nung a phut anga inziak chu zirchiana a theih anga hmalak an rel.
GST chungchang inzirtirna tam zawk neiha file kalphungte pawh inzirtirin, hei hi GST petuten tlawm zawk leh tha zawka an pek theihna tur a nih dawn avangin zirhona tam zawk neih an rel bawk.
Contractor-ten VAT atanga GST a luh hmaa tender VAT rules a chhan ni si, July, 2017-a GST kalpui ni ta si, GST ratea tax an lo pek tawh leh GST 12%-a an chhan, 18%-a tihpun hnan taka 18%-a GST pek chu claim dan a awm em tih pawh lo zir chian nise an ti.
Hetihrual hian tun dinhmunah SOR 2019 hmang project-ah chuan GST 12% included a ni a. Mahse, July 13, 2022 khan 18%-ah tihsan a ni leh ta thut chu Mizoram PWD SOR 2019 hmangtute chuan an agreement rate aiin 6% zelin an pe tam leh tawh mek a, hei hian Contractor te buaina tamtak a thlen mek tihte an sawi ho bawk.