Aizawl: MPYCC President Laltawnliana chuan Chief Minister Lalduhoma leh ZPM sorkarin kawng siamtute thunun ngam lovah a puh.
Nilaini khan Congress Thalai hruaitute chuan Durtlang leh Kawnpui inkar kawng, Vairengte leh Kawnpui inkar kawng dinhmun hmunah an enfiah a, NHIDCL, Balaji leh Randu Construction hotute nen an inkawm a. Kawng an enfiahnaah Congress thalai president chuan kawng chhe lutuk leh kawng siam tawhte pawh a that loh em avangin Mizoram mipuiin harsatna namen lo an tawk tih a sawi a. Sorkarin kawng a vil that tawk loh zia a chiang hle tih a sawi.
MPYCC President chuan chief minister leh ZPM sorkar chu kawng siamtute a thunun ngam lovah puhin, an ngenna leh nawrna pawh engahmah an ngai lo tih a sawi a. Kawng siamtute chuan ZPM sorkar aiin Mizoram BJP President thar Dr. K. Beichhua ngenna an ngai pawimawh zawk hian ZPM sorkarah thil engkim a harsa deuh deuh dawn tih hi a lang chiang hle, a ti.
Kawng chhia avanga lirthei liante an tluk laiin, ZPM sorkara Kolasib bialtu MLA, Deputy Speaker ni bawk erawh lirthei changkang leh manto chhungah chuangin kawngchhia an inkharkhum san a, kawng tha neih chu thil beiseiawm tak a ni lo tih sawiin, “Mizoramin kawng tha kan neih theihna turin Chief Minister Pu Lalduhoma leh PWD Minister Pu Vanlalhlana hian an nihna hi mi dang an ken ngam hunah chauh Mizoramin kawng tha kan neih a beiseiawm,” a ti.