Aizawl: Lai Autonomous District Council (LADC) chungchangah high court-in nimina a ngaihtuah chhunzawmah thutlukna a la siam lo va. Gauhati High Court, Aizawl Bench chuan July 23, 2025-ah ngaihtuah leh turin a dah.
LADC-a chief executive member lo ni tawh, tuna ZPM MDC ni lai, V. Zirsanga chu February 27, 2025 khan CEM atan lakluh niin a kaihhruai LADC-a ZPM sorkar chuan April 17-22, 2025 chhung khan budget session pawh neiin a pass a. Budget erawh dan kalha pass nia sawiin Mizoram larsap chuan a pawm lo.
Hemi hnu hian BJP leh MNF ten an din, United Democratic Alliance chuan LADC-ah sorkarna an siam thei tih larsap hnena an thlen a. An hruaitu, M.Kawnpui bialtu MDC, BJP hruaitu N. Zangura chu May 8, 2025 khan CEM atan lakluh a ni.
ZPM sorkara CEM V. Zirsanga chuan CEM atanga paih a nih danah dan palzutna a awm nia hriain dikna humhim a nih theih nan hma la turin high court-ah a thlen a. Hemi chungchang hi May 15, 2025 leh July 10, 2025 khan a ngaihtuah hnuah nimin khan ngaihtuah lehin thutlukna a la siam lo a. July 23, 2025-a ngaihtuah leh turin a dah a ni.
High court thu kal lai a awm vangin LADC-ah hian sorkar mumal a kal thei lo va, tuna CEM ni lai, N.Zangura pawh hna thawk thei lovin dah mek a ni.
Dan pangngai ang chuan LADC-ah hian kumin kum tawpah inthlanpui neih a ni ang.