Kan ram kawngpuite hi zauh ngaihna a awm tawh lo hlawm viau a, kan khawpui chhung kawngpui ngat phei chu tihngaihna a awm tawh lo.
Kawng chhawng kan siamte a nih ngawt loh chuan kawngpuite hi a chep tial tial dawn a, lirthei nei lah kan pung tual tual zel bawk si, kan kawngpui hmabak hi a thim hle.
Transport department chuan kumin January – June inkar chhung ringawt pawh khan lirthei 14,911 an ziak lut thar a, heng zingah hian Aizawl district chhung a la tam ber bawk.
He kum chanve chhung ringawta lirthei ziah luh thar pawh hi tam tak a ni. Neihsa ho nena belhkhawm phei chuan kan khawpui chhung kawng tan hian manganthlak a tling tak zet tawh.
Kan lirtheite hi intlanchhawk hun siamsak mah ila a sawt mawh viau tawh mai a, ramdang leh khawpui danga an kalpui ang kan entawn mai pawh hi a tul tawh awm e.
Kan ram khawpui New Delhi chuan lirthei petrol leh diesel hmangte chu kum 10-15 an tlin chuan tlan phal loh an nih thu an chhuah rup ngam a, hei hian engemaw zawng tak chuan rah tha a chhuah ngeiin a rinawm.
Keini pawhin engemaw ber hmangin lirthei khuahkhirhna dan nghet deuhte hi nei ila, kan khawpui kawng zauh ngaihna reng reng awm tawh lo hi a lo thawl leh deuh zawk theih nan ruahmanna tha deuh i nei thuai teh ang u.