- Dr. C. Lalrampana
A KAMKÊUNA
Sakei pangngai baksam nei lo chi hi saptawnga Tiger an tih hi a ni a, Sakei chi ve tho baksam sei tak neiho hi Lion an tih hi a ni. Sakei chi ve ve tho mah ni se, insuala ralah chuan baksam nei ve loho hian baksam neiho sakeibaknei hi an ngam lova, chuvangin, sakeibaknei hi an huai zawk a ni. Hetiang bawk hian India ram Democracy rorelna hnuaiah hian state leh UT sawrkarah chuan constitutional head chu Governor leh Lt. Governor-te an ni a, CM/Council of Minister-te hi constitution dungzuia dan siamtu leh dan anga mipui chunga roreltu an ni. Entir nan: Governor/Lt. Governor chu Sakeibaknei ang an ni a, CM/Council of Ministers chu sakeipangngai ang an ni. India President leh Central sawrkar thulakna ber leh a rinrawl ber chu Governor/Lt. Governor-te an ni.
TUNGE HUAI ZAWK CHU?
CM leh CoM-te hi mipui roreltu ni mah se, anmahni thiat sawm tura President of India leh sawrkar laipuia thurawn pe theitu, presidential rules-a dah tura rawtna thlentu chu CM emaw, Council of Ministers emaw ni lovin Governor/Lt. Governor-te an ni. Kum 1987-a Pu Denga ministry kha Pu Chawngzualate hovin an chhuahsan tum khan Mizoram Legislative Assembly Speaker chu Pu J. Thanghuama niin March 10, 1987 atanga January 30, 1989 thleng khan he hna hi a thawk a ni. CM Pu Denga thurawna Speaker-in Pu Chawngzualateho disqualify tuma a beih lai tak khan Mizoram Governor Pu Hiteshwar Saikia khan President of India hnenah Mizoram chu Presidential rules-ah dah turin thurawn a pe thut a, tichuan, Jan 30, 1989 AIR Delhi chuan Mizoram chu Presidential Rules a nih thu a puang ta dum dum mai a; State Assembly chu thiah a ni nghal a, CM & CoM-ho chu an hawihil der a nih kha! Chuvangin, State/UT sawrkarah hian CM/CoM aiin Governor/Lt. Governor-te hi an lal zawkin an thu zawk a ni tih i hrethiam teh ang u.
KA ZANTIANG TAWNMANG CHU?
Eng ti thei mah suh ila mut hmun leh awmhmuna ram kalsian lungkham rêng rênga mutmu pawh tuah tha thei lo ka nih thin avangin khatia Mizoram Governor leh State sawrkar anti-defection law ken kawh chungchanga ngaihdan inmil lova a buai deuh nuai lai khan Jan. 29, 1989 zan khan mumang ka nei a. Raj Bhavan gate hmar lam bulah sawn Ârbâwm kawngkhar nei lo chhungah Sakeibaknei kawlh zet mai hi a vir kual zak zak a, chutia ka en reng lai chuan sakei pangngai tial thuk mai hian sakeibaknei chu seh tuma a vel sek lai chuan sakeibaknei chuan ârbãwm kawngkapui atang chuan sakei nghawngah chuan a rawn hap thut a, sakei chu a let tawpa a chechâng ta rêng rêng lova mak ka ti hle. A tuka ka pisa kai haw kawngah chuan AIR Delhi-in Presidential Rule-a dah kan nih thu a puan thawm chu ka hre ta a, ka mumang ka hre chhuak zawk a, mak ka tiin dik ka ti hle. Mahse, thenkhatin zawlnei der min tih ka hlauh avangin ka nupui bak ka hrilh ta lem lo. Thenkhat chu ni se inlarna hmu angin an au chhuak chiam mahna le? CM nge thu Governor tih zawhna awm nuai nuai chu a taka a chhãnna a lo thlen tak avang khan kan reh ta thuap a nih kha!
ADC/CADC CHUNGAH TUNGE THU ZAWK?
Mizoram Governor-in CADC a thiah chungchangah ZPM-in CoM thutlukna an thlawpin Home Minister pawhin Press mite hmaah Governor hmalakna dik lo anga a sawite kha an tih loh tawp tur an ti niin a lang.
ZPM chuan Home Minister K. Sapdanga, Chief Minister charge la mektuin Chakma Autonomous District Council (CADC) thiah chungchanga Press Conference a neih tuma Governor-in Chakma Autonomous District Council (CADC) a thiahna sut leh (revoke) ni se tih Council of Ministers (CoM) ngaihdan a nih thu a sawi chu an thlawp thu an sawi a. ZPM chuan Constitution of India, Sixth Schedule Para 14 angin Governor hi autonomous district/region-te inrelbawl dan zirchiang tur leh report pe turin Commission din phalsak a ni a, Commission report chu Governor recommendation nen state legislature-ah present tur a ni. Para 16(1) angin zirchianna behchhan hian autonomous district/region-te inrelbawlna chu thiah (dissolve) emaw, inthlan that (fresh election) buatsaih theih a ni. Para 16(2) anga CADC hi hna thawk thei lova buaina tawk emaw a ni lo a, Para 16(2) leh Para 20(BB) behchhanin floor test neih a ni hek lo. Tin, Supreme Court case [SR Bommai vs. Union of India (1994)] angin mipui thlan tlinten rorelna chang turin majority an nei em? tih hi executive-te ngaihdan ni lovin, thlan tlin ten floor test hmanga finfiah tur a ni, tih a ni bawk.
Chuvangin, Hon’ble Governor-in CADC a thiahna Notification No A.43016/3/2023- DC&MA(C)/Pt, Dated Aizawl the 7th July, 2025 hi sut leh (revoke) ni se tia Mizoram Sawrkar Council of Ministers-in ngaihdan a siam hi ZPM chuan an thlawp a, rorelna fawng chelhtute ngaihdan tur dik niin an ngai bawk, tih thuchhuah an siamah an tarlang a ni. A dik tak chuan LADC & CADC -te hi thuneihna Imchuh rêng rêngin an koham a, rorel hman pawhin an khawsa lo a ni tih Mizoram Governor hian a hriat chian êm avangin Governors’ Rule-a dah leh dah loh thuah chuan a thu thu a nih miau avangin CM & CoM leh ZPM mipuite hi lungawi lo hle mah se an ngamlohvin an tukhumah a bêng bu ta dawrh niin a lang.
A TLÂNGKAWMNA
ZPM ministry-in ADC tinah rorelna chan an duh luat vang nia ngaih theiha Governor an puhmawh nia ngaih theih thu an vawrh darh chiam mai hi ngun taka ngaihtuah chuan an ât huai a ni mai lo maw? tih hi zawhna pawimawh tak a ni. Assembly Speaker Pu J. Thanghuama’n MLA tlantaute chungchangah Governor aia thunei zawka a insawi anga sawi thin leh Pu Denga’n “Governor chu kan seal pakhat mai alawm” a ti nia an sawi tum ang khan kan Governor hi an khak sual ve palh ang tih a hlauhawm hle. Constitutional Head a nihna anga Governor-in CADC a thiah thuah an ngaihdan ni lo mah se, sawinawi nei lovin ihe lovin pawm ve mai se an tihtur zawk ni awm tak a ni. AAP Ministry CM Kejriwal khan Delhi Lt. Governor kha a khak a khak a, a tawpah a chan chau zawkah a tang tih kha kan la hre theuh awm e. Pu Denga Ministry pawh khan Governor kha an cho sual niin a lang. Presidential Rule-a dahtir theitu a’n chet meuh kha chuan luthak an hiat an hiat mai kha a ni a, Pu Denga phei chuan- “Central sawrkar hian kan tin hriam min thlawnsak tetea kan hnung lamah chemtein min vitzuileh si a” a ti e, an tih thinte chu rilruah a la cham reng mai! Tunah pawh ZPM Ministry hian Governor thutlukna hi ngawi rengin ihe lovin pawm ve mai se an tifuh zawk ngei ang. Governor hian Financial crisis avanga sawrkar kal tha thei lo nia a hmuh vaih phei chuan Presidential Rules kan hlat vak bik lo mai thei asin? Chuvangin, sakei pangai tiger aiin sakeibaknei lion hi a huai zawk tih i hrethiam tlang teh ang u.