- K. Hmingthankaia
ZPM sawrkar hi an khawngaihthlak ka ti. Kha chen kan ram kal dan dik tawk tawh lo, sawrkar leh sawrkar hnathawkte kal dan dik tawk tawh lo leh mipui rilru dik tawh lo chu, a theih chin china siam that an tum a ni a. Infrustructure lian tak tak leh hmasawnna lam chu ngaihtuah hleihtheih pawh ni lovin, kalphung dik leh mipui rilru put hmang chu siam that hmasak phawt a tul tawh si a. Politic atang chuan thil tha famkim hi tih nghal pur pur theih loh mah se, an theih chin china siam that tumin, harsa tak leh dodalna nasa tak karah an bei ve tang tang chu niin a lang si.
Mahse, mipui rilru lah chu a lo kal sual thui tawh si. Rinawmna leh diknate, takna leh rilna tlachham tawhte kan lo ni tawh si a. A lem leh a dera nung thiamte, mahni intihlar leh mahni hlawkna chauh zawngte, mahni hausakna tur chauh buaipuitute, midang chungnung tur leh mite thil tha tih tum apiang lo dodal ngar ngar thinte leh, chutiang lama lamtang zawng thiam em emte kan lo ni tawh si a.
Opposition- ho lah chu, mi tihsual, tihpalh leh tih dik lohte lo chang ngar ngar mai ni lovin, sawrkar thil tih tum apiang lo itsika, lo sawi chhiata lo sawi bawrhbansak zel leh, lo tih khawloh tum zeltute an ni bawk si. Kan vaia that tlanna tur aia, politic lal thuthlenga an thut theih dan tur chauh ngaihtuah ngar ngar chu an hna pui ber a ni si a. Opposition awm tawh zawng zawngah tun ZPM sawrkara opposition- hi an la uchuak berin ka hria.
Mahse, hei hi chu mipuiin hre thiam ila, he khawvel hi Setana lalna a ni a, miin thil tha a tih nasat dawn poh leh dodalna leh sawi chhiatna a nasa tih hi. ZPM sawrkarah hian engkim a tha thei dawn kan ti lova, kan beisei hek lo. Mahse, a hmaa mite ai chuan tih dik an tumin an ti dik mek deuh zawk niin a lang a, mipui pawhin demna em em kan la nei hrih lo niin a lang. A tha famkim thei lo rau rauah a teuh deuh ber niin kan hriaa, beisei pawh kan la nei lian hle deuh niin a hriat. Chutih kara hun rei pawh a kal hma atang khan, an sawrkar tirh atanga heti em ema sawrkar an bei chiam chiam leh, sawrkar tihmualpho tuma mipui fuihpawrh an tum vak vak reng hi khamawm ka ti thin.
Sawrkarin department leh a hnathawkte an siam tha dawna, engahmah hmain a mak makin kan lo dodal nghal ringawt zel a. Sawrkarin uluk taka a ngaihtuah hnuah a hnathawkte an sawn kual dawna, chu departnent chhungril leh inrelbawl dante leh, chu mihring an sawn tur chanchin leh a service-te, mi nazawng hriat ve tul lo, sawn a tulna chhan hrang hrangte hre tawp silo leh, sawrkar dan leh dun leh inrelbawlna hre pha ve miah lote thleng thlengin sawrkar thil tih dodal tur chuan kan lo phur ve em em zela, kan lo pawr ve em em zel a nih hi. Heng zawng zawng hi opposition- ho rilru chhe puakchhuak a ni ang tih chu a rin theih vek a ni.
A thuhrimah, sawrkarin a hnathawk tupawh a sawn dawn apianga, a mika mak pawh hre pha ve lo thlenga kan lo buai luih luih zel ta mai hi engtizia nge ni ta? Tunhmaa kan chin than pawh a ni lo. Thu neitu emaw kan lo inti vek thinte hi a zahthlak lo maw. A duh duhin sawrkar chu vaukhan na tak takte kan lo pe thul. Kan zaktheilo hi ka ti thin. Hetiang hi state dangah an ching ve em le? Kan ramah chuan kan intihhmuh chho tulh tulha, sawrkarin a hna thawk tupawh a transfer a pianga lo rik luih luih ziah chu kan tih tur, kan hnam zia, kan ram tih dan a lo ni chho mek ta a nih hi. State dangte hian nuihza siam nan min hmang mai lo ang maw? Vai rama engemaw hlek thil thleng a awma, a thu haw lam leh kal lam pawh hre lo, a sakechek nazawng, kutdawh thlenga an lo pawr ve em em ringawt zel leh, thil tih chhiat nuam an lo ti em em thin ang chauh khu kan nih tak hi. Hetiang chuan eng sawrkarah pawh kan ching chho zel anga, hnamdangin Mizo ziaah min la ngaihsak mai ang tih a hlauhawm e.
Chuvangin, tun ZPM sawrkar hian hmasawnna lian tham pui pui buaipui aiin, kan mamawh hmasa zawk kalphung tha leh dik leh, kan rilru puthmang hi siam that hmasak han tum ngar ngar phawt mai ula, huaisen takin siam that ngai chu siam tha zelin, transfer ngaite chu han transfer hmiah hmiah zel ula. Chutianga kan ram tan, kan vai tana tha tur ngei pawh, rilru zimte put vanga lo dodal thintute chu sawrkar chakna hmang pawhin na takin an chungah ti zel mai rawh u. Chutiang tih nana in term khatna in hmang zoa, inthlan lehah in tlak phah ta a nih pawhin, kan ram kan hnam tan nasa takin thil tha in ti hmanin, kawng dik in lo sial hman tihna a ni dawn tho si a. Kalphung dik leh rilru dik kan neih hmasak phawt chuan thil tha dang chu a lo kal dik zel mai ang.
A chhe zawnga khawvel thar kan hmachhawn mek karah hian, kan rama thil thleng mekte leh kan awmdan thlir hian, nitin a chhe zawnga Zoramthar pawh a thleng ve mek niin a langa, chutih kara thlamuanpuiawm tur sawrkar kan neih a ngai a ni.
He khawvela kan cham chhung chuan, kan chunga ro reltu tur, politic lalna chang tur kan thlan angai si a. Chuvangin, tuna opposition- ho duhdan ang hian, mipuite hian ZPM sawrkar hi lo paihthla ta ila, tun dinhmunah tute nge kan beisei leh chuan ang le? Bible-in, mitinin kan tuhrah ngei zel kan seng dawn a tih angin, mipui ngei hi mawhphurtu chu kan ni e.