Aizawl: Synod Hospital, Durtlang-ah 3 Tesla MRI khawl thar leh a room chu Rev. R.C. Lalnghakliana, Moderator, Mizoram Synod-in Pathian hnena hlanna leh hawnna hun a hmang.
He hun hi Rev. Dr. K. Lallawmzuala, Executive Secretary i/c Hospital-in a kaihruai a, Rev. R.C. Lalnghakliana, Moderator, Mizoram Synod-in Pathian hnenah hlanin a hawng a. Dr. Lalnunnemi, Medical Superintendent-in MRI khawl lei tura Synod-in a rel dan te, hmalak dan te, tihhlawhtlin a nih tak dan leh technical report a pe a; Dr. R.L. Sanghluna, Director, Synod Hospital-in lawmthu a sawi.
3 Tesla MRI khawl hi Rs. 14,80,00,000 sengin Synod-in a lei a ni a, MRI khawl hi March 30, 2025-ah a lo thleng a, a dahna room siam leh installation-te tihfel hnuah hman theihin hawn a ni ta a ni.
3 Tesla MRI hi Mizoramah chuan a hmasa ber a ni a; North East India-ah hian 3 Tesla MRI hi 10 chauh a awm a, a nei thei zinga Synod Hospital an tel hi Hospital thuneitute chuan a lawmawm an tih thu an sawi.
Synod Hospital thuneitute chuan hetiang khawl tha tak, Mizorama la awm ngai lo an nei thei hi Pathian khawngaihna leh Kohhranhote tan honna vang niin, lawmawm an tih thu an sawi.
- 3 Tesla MRI thatna bik chu:
- A scan chhung a rei lo bik hle.
- A fiah bik em em.
- Damlo mutna leh a khawl a len avangin damlo tan a nuam.
- Cancer screening-na atana hman tlak tak a ni.
- 3 Tesla hi thluak, ruh chuktuah leh tihrawl en nan a tha bik a ni.
- Biometrix leh artificial intelligence technology hmang a ni.