Aizawl: Social Welfare Minister Lalrinpuii’n Mizoram state sorkar enkawl Upate Rûn chu mi 20 awm theihna tura tihlen a nih tur thu leh, kum upate ni hmanna tur atan Rs nuai 5 ruahman a nih thu a sawi.
Nimin khan Minister Lalrinpuii’n Ainawn venga Upate Run, State Senior Citizens’ Home tlawhin, Mizoram sorkarin Upate Run a nei chu lawmawm a tih thu a sawi a. Tun dinhmunah mi 10 awm theihna ni mek chu mi 20 awm theihna tura hmalak a nih tur thu sawiin, rilru lama harsatna neite tana hmun bik, Mental Rehab pawh mi tam lehzual awm theihna tura hmalak nghal a nih tur thu a sawi.
Minister chuan Care giver-te training programme buatsaih a nih thu leh tun dinhmunah mi 50 train chhuak an awm tawh thu te, chung mite chu indaih lohna leh tulna avanga upate enkawl kawnga harsatna neite tan koh theih an nih tur thute a sawi a. Sorkar hmalaknain mumal zawka physiotherapy leh mobile medical service-te kalpui tum a nih thu a sawi bawk.
Heng bakah hian kum upate ni hmanna tur atan Rs nuai 5 ruahman a nih thu leh NSAP hnuaiah kum 60 chunglam ten pension an lak theih thin te, mi tam lehzualin an lak theihna tur leh mi harsa zawk, hmeithai leh naupang chaklo, tanpui ngaite tan Social Welfare Department kaltlanga sorkarin tanpuina a pek thin hrang hrangte pawh mi tam zawkten an hlawkpui theihna tura hmalak mek zel a nih thu a sawi bawk.
Upate Run, Senior citizens’ Home hi kum 60 chunglam, enkawltu leh chawmtu mumal nei lo ten, hlim tak leh thlamuang taka a thlawna an belh theih tura duan niin, Social Welfare & Tribal Affairs Dept hnuaiah, January ni 1, 1989 khan din a ni a. Tum khatah mi 10 awm theihna niin, din a nih tirh atanga vawiin thlengin mipa 52 leh hmeichhia 26 enkawl tawh an ni a, tun dinhmunah mi 7 awm mekin, awm dil, endiklai mek mi 5 an awm bawk.
A hmunhma thawmthat mek niin, chawlh hahdamna tur ‘Inte’ sak thar a ni tawh a. Hei bakah an hawi thawvenna tur Recreation Park siam tura hmalak mek a ni bawk a, upate enkawl tur hian Welfare Officer kaihhruaina hnuaiah thawktu mi pariat an awm mek a ni.