Aizawl: Tun dinhmunah Mizoramah TB vei enkawl lai mi 1,501 an awm mek a. TB vei zinga zaa 32.5 chuan taksa mamawh chaw tha dawng lo nia chhut a ni.
Sorkar laipui hmalaknaa kum 2025-ah India chu TB vei awm lohna hmuna siamna tur, Pradhan Mantri TB Mukt Bharat Abhiyaan chu nimin khan larsap, General Dr. Vijay Kumar Singh hovin Raj Bhavan-ah hman a ni. Inkhawma tarlan a nih danin, tun dinhmunah Mizoramah TB vei enkawl lai mi 1,501 an awm mek a, an zinga 117 in Food Basket chhawmdawlna an dawng a, TB vei zinga zaa 32.5 chuan an taksa mamawh ang chaw tha an dawng lo ni a chhut a ni.
Ram puma State leh UT te TB score siamah Mizoram chuan point 68 hmuin 12-na a ni a, a hlawhtlinna rate chu zaa 79.50 niin, TB vei zinga zaa 5 velin an thihpui anga chhut a ni a, nikum khan TB vei 2,306 awmin, TB thihpui 136 an awm a ni.
Pradhan Mantri TB Mukt Bharat Abhiyaan hmannaah hian Food Basket Support hnuaia TB veite tana ei tur hrisel leh tha thawhtu, Nikshay Mitra thate hnenah chawimawina hlan a nih bakah Food Basket Support kaltlangin TB veite hnenah eitur tha sem nghal a ni a. NEDFi in TB vei mi 100 te Food Basket Support kaltlanga an chhawmdawlna Rs 4,90,000 chu larsap hnenah an hlan a ni.