Ethan Nwaneri chuan Arsenal tana rinawm zel a thlang a, kum nga chhung atan contract a ziah belh a, Emirates Stadium-ah 2030 thleng a la awm leh dawn a ni.
English midfielder kum 18 mi hi 2022-23-ah khan Premier League-ah a inlan tan a, khatih lai khan kum 15 leh ni 181 niin Premier League khel thei naupang ber a ni a. Tun thlengin Premier League-ah vawi 28 a khel tawh a, boruak a siam chho hle.
Season hman zawh takah khan Champions League-ah vawi sarih a inlan a, Arsenal chu semi final a luhpui a. Inelna hrang hrangah goal kua thunin, mi goal thun tur vawi hnih a siamsak bawk a, khelmualah mi mit fukna a ni chho mek a ni.
Thla hmasaah khan Arsenal chuan Nwaneri hi a thuphungin inremna an neihpui tawh a, Zirtawpni khan contract hi an ziahpui thei ta a ni.
Nwaneri chuan, “He contract ka ziak thei hi ka tan chuan a hlu hle a, ka tan chuan engkima engkim a ni mai. Tun hi senior team-a season tir atanga hun ka hman hmasak ber tur a ni a, ka tan chuan thil danglam tak a ni,” a ti.
“He team tana tangkaina ka nei thei tur hi phurawm ka ti a, a tam thei ang ber chakpui ngei ka duh a, he club hi hlawhtlinpuia nomawi lakpui ka duh a. He lai hmun hi ka tan chuan in dik tak a ni,” a ti bawk.
Season tan hunah Nwaneri hian No. 22 a chang dawn a, Hale End Academy chhuak hian a hma season thumah khan No. 83, 63 leh 53 te a lo chang tawh a ni.