- Rinfela Zadeng
Vawiin khawvel hi ennawm khawvel (entertainment world) a ni a, chu chuan mi hausa ber atanga mi rethei ber thlengin a fan chhuak tawh a. Chumi khawvel leh mihringin dam khawchhuahna atana kan mamawh khawvel thil tak tak hi kan thliar thiam loh chuan kan boral dawn a. Mi hausate sum siamna kan ni reng dawn tihna a ni. Ennawm khawvelin a nghawng langsar deuh te han sawi zui ta ila –
- Thu leh Hlaah
Kum Zabi Sawmhniha leh a hma lam zawngah kha chuan thu leh hla tha, lehkhabu tha te hi a hlu em em em a. Chutiang thu leh hla tha chuan mihring nun a khalh ngil a, zirlaibuah te seng lutin vawiin thlenga kan la zir tak zel te pawh an awm a nih hi. Mahse vawiin khawvelah chuan thu leh hla hian a hawi lam (trending) a thlak ta hlawk a. Kan tana tha tur aiin kan tui zawng, kan mamawh aiin ngaihnawm kan tih zawng thu leh hla a pian chhuah phah nasa a. Chumi pholanna tur hmun lah chu kan nei tha nasa tawh mai si a. Sum dawng hausa leh fing, Social Media lian Facebook, Threads, Instagram leh WhatsApp te Meta Platforms, Inc. hmanga thununtu Mark Zuckerberg chuan keini mi rethei ber te pawh kan inpholan ve zelna turin hun leh hmun rem chang min lo siamsak thuai thuai tawh bawk si nen. NewYork leh Herhvalilawn a mi pawhin angkhat rengin heng Social Media-ah hian kan duh zawng thu leh hla chu reels/story/ststus hmangin kan pho lang ta zung zung mai a nih hi.
Chu chuan thu leh hla un tak tak aiin, hriatthiam awlsam, ennawm khawvel thlahlela kan hun tam zawk hmangral thin thalaite duh zawng thu leh hla a hring chhuak ta zawih zawih a. Chu chu a that leh that loh chu keini lo sawi phak a ni hauh lo ang. Mahse kan mamawh thu leh hla aiin kan duh zawng thu leh hla chu a piangchhuak tam tih erawh kan sawi thei ang. Chuvangin thu leh hla nihphung nghet tak lo awm thin, lehkhapuana ziaha chilhkhawma lehkhabu chhah tha tak ni ṭhin kha Social Media lamah kuta vawikhat han tuai hleka lo chhuak ta mai, awlsam zawk leh darhzau zawk bawk si-ah kan thu leh hla te hi a lo chhuak ta zel a. Thu dik tawk lo te, mi pawisawina leh thu belhchian dawl lo tam tak a lo piang a, dan bawhchhia leh mualpho pui ta te pawh kan awm ta nawk reng a nih hi.
Thu tha leh tangkai, un tak leh tawng upa tel nawk thu leh hla aiin kum sawm mi naupang pawhin a hriatthiam nghal theih thu leh hla tluang, a awmze sawifiah ngai lo hi kan bawh ta zel a. Hei hi kan thatpui em tih chu hunin a la hril zel dawn a. thalaite duh zawnga thusawi thiam, ziak thiam leh lehkhabu chhuah thei ziakmi chu kan ngaisang chho ta telh telh a. Entertainment ang zawnga thu leh hla chhawp chhuak thiamte chu an vannei zel dawn ta ni pawhin a lang.
- Infiamna huangah
Infiamna hian nihphung hran a nei a, mahni taksa leh rilru thunun chunga taima taka infiamna khawvel hi kalpui a ni thin. Tun hnai atang chuan infiamna khawvel pawh hi ennawm khawvelin a chiah hneh tawh em em a. Sum leh pai tam tak a lo kengtel bawk nen, han khap theih pawh a ni ta lo. Football bik han sawi ta ila – hranghlui inkhelh thiam em em te kha chuan thlantui far zawih zawihin football an khel a, thil dang an buaipui lem lo. An thawhrimna chuan ennawm khawvel huangah a hruai lut zawk a, mahse chu chuan an infiamna khawvel kha a ti buai pha lo. Nupui pasal chungchangah pawh an rinawm em em thin a nih kha.
Tun hnaiah erawh chuan infiammite pawh ennawm khawvelin a chiah hneh ta em em a; a behbawma buaia thamral ta mai mai pawh an awm ta nual reng a nih hi. Nupui pasal thu-ah pawh an fimkhur seng ta lo fo a, nulat tlangvalna kawnga hmingchhia leh sawizui hlawh tak tak te pawh an awm ta nuk reng a nih hi. FC Barcelona player naupang hmabak eng tak nei Lamine Yamal te pawh hi talent tha tak a nei a, mahse ennawm khawvel hian a chiah hneh lutuk chuan a zuih ral mai ang tih a hlauhawm a nih hi.
- Mi hausa te sum siamna keini
Ennawm khawvel hi va doa va beihchiam a tul lo a, mahse he khawvelah hian a awm tawk kan inchiah thiam a pawimawh hle. Mi hausa leh hlawhtling tawh, hlawhtling mekte chenna khawvel a ni a, chu an khawvel chu va chhim reng kan tum chuan – an tan sum siamna tha tak ni reng dawn a. Thawhchhuah kan neih bawk si loh chuan kan va chhim reng thei dawn lo a. Chu chuan dik mang lo leh thianghlim lo taka sum leh pai lakluh mai duhna sual thuk takah min hruai lut thei a ni.
Ennawm khawvel tihlawhtlingtu ni ringawt bik loa ennawm khawvel siamtu zawk kan nih theihna tura kan phak tawk theuha hlawhtlinna neih tum beih fan fan te hi kan tih hmasak tur a ni a. Mi hlawhtling tawhte nun dan leh an khawvel siam chawpa kan sum leh pai tam tak luan ral tir ringawt bik loin, mi umzui leh ennawm kan nih ve theihna tura mi hlawhtling nih te hi kan tih hmasak tur a ni.
Thuziak mawi leh tha, kan duh zawng takte hi reels/sotry/status sup sup ila. Chutih rual chiah chuan kan taksa leh thlarau nun chawm thu tha leh hlu te hi hre tel tlat bawk ila. Instagram story-a Q & A kan huam ang chiah hian hna tha leh zahawm tak kan thawhtheihna tura exam Q & A te hi han chhang thiam tel bawk ila, khawvel hi kan tan a nuam zual ngawt ang. Kan Gpay kiam zawng khawvel ringawt ni lo, a muk zawng leh a la lut zawng khawvel kan neih theihna tura buai te hi i tum ang u – ennawm khawvela awm reng chung si hian.