Miss Diva Northeast 2025 neih zawh taka winner, R. Lalduhsaki chu vawiin (Aug. 11, 2025) hian an khuaah zan hnih riakin a haw dawn.
Nunutei tia an koh, R Lalduhsaki hi Haulawnga piang leh sei lian a ni. Miss Diva Northeast winner a nih hnu hian programme hrang hrangah sawmtu a nei chho tan a. He’ng an sawmnate tihlawhtling a, programme hrang hranga a inlan hmain an khaw lamah hawna hun remchang a nei thei hlauh dawn a. Vawiin hian an khuaah hawin, zan hnih hahchawlhna hun a nei zawk dawn a. Nilaini khian Aizawl a pan leh ang.
Nunuteii hi inrinni zana Vana pa hall-a Mizo film thar — Kei leh Nang — tlangzarhnaah pawh a inlan a ni.
August ni 5, 2025 zan khan Guwahati-a Radisson Blu-ah Miss Diva Northeast 2025 Grand Finale-ah Nunutei hi winner atan puan a nih bakah, Miss Congeniality title a la bawk.
Miss Diva Northeast 2025 winner a nih avang hian, Nunutei hi Miss Diva 2025 finalist niin, he intihsiaknaah hian hmar chhak ai a awh dawn a ni.
Miss Varsity 2024 contestant pawh lo ni tawh, Nunuteii hi Mizoram atanga Miss Diva Northeast title hlawh chhuak thei hmasa ber a nih piah lamah, Miss Diva finalist ni thei awmchhun a la ni.
Tuna hian Mizoram University-ah MA (English) a zir mek.