Aizawl: Lirtheia eizawng pawl hrang hrang joint committee-in ‘tlan chawlh’ an puan chu Inrinni tlai dar 4 khan an titawp a. Thla thum tak chhiah awltir tur leh chhiah pek theih loh avanga a pung leh penalty chawi ngai zawng zawng ngaidam vek turin sorkar an phut.
Lirtheia eizawng pawl hrang hrang joint committee chuan August 4 atanga Inrinni thleng ‘tlan chawlh’ an puan chhungin kawngpui siam a nih dan chu a theih anga tam an enfiah tih an sawi a, an beisei angin hnathawk an tam lo va, hmalaknate pawh an duhkhawp lo hle chungin Ningani atang khan sorkarin lirthei an chhuah a. Kawngpui siam a nih dan an thlirin an beisei a sang lo hle chungin sorkar berin lirthei tlantir a tum avangin lirthei tlante chu an dang lo va, anni pawhin an lo sawi lawk tawh angin Inrinni tlai dar 4 khan tlan chawlh an puan chu an titawp a, an tlan zui tih a sawi.
Joint committee hruaitute chuan kawng chhia vanga an harsatnate chu hriatsak a, thla thum tal chhiah awltir tur leh chhiah pek theih loh avanga a pung leh penalty chawi ngai zawng zawng ngaidam vek turin sorkar an phut a. Mizorama financial insitution hrang hrangte pawh an harsatna hrethiama an hnena loan late harsatna lo siamsak lo turin an ngen bawk.