US President Donald Trump-a’n a kawmngeih loh mek laiin Prime Minister Narendra Modi leh Russian President Vladimir Putin-a te chu an inbia a, Ukraine-a thil thleng mek leh an pahnih inkar thil hrang hrang an sawi dun.
Ram pahnih hruaitute hi Trump-a’n tariff sang zawk lak tura a tih ve ve niin tun hnaiah US hi an kawm hnai vak lo.
“Ka thian, President Putin-a nen tha takin kan inbia a. Ukraine-a thil thleng mekte min hrilh avangin ka lawm a. Kan ram hnih inkara kan sawi dun a, India-Russia Special & Privileged Strategic Partnership chu tihngheh zel tha kan ti a. Kumin kum tawpah President Putin-a hi India-ah ka lo mikhual pawh ka beisei,” tiin Modi-a hian Zirtawpni tlai khan X-ah a tar lang.
Putin-a hnenah Ukraine-a thil thleng mek leh kal zel a hrilh avanga lawm thu a sawi rualin prime minister hian India chuan muanna a la duh reng tih a sawi.
Hruaitu pahnihte hi National Security Advisor (NSA) Ajit Doval-a’n Ningania Kremlin-a Russian president a kawm hnu darkar 24 pawh tling lovah an inbia a ni.
US President Trump-a chuan India hi Russia atanga tuialhthei a lei avangin a bungrua a lak luhah chhiah (tariff) sang zawk lak a tum mek.
India chuan Washington tih dan hi ‘tha lo, dik lo leh chhan awm lo’ tih sawiin an mamawh lak luh chu a man azir zel a nih thu leh India-a mihring tluklehdiungawn 1.4-te hlawkpui tur angin thil a kalpui zel dawn tih a sawi.
Russian president-in India a tlawh hnuhnung ber chu December 6, 2021 kha niin Delhi-a 21st India-Russia Annual Summit-ah a ni.
Modi-a hian Russia hi nikum khan vawi hnih a tlawh thung a, July thlaah 22nd Russia-India Summit-ah telin October thlaa Kazan-a BRICS Summit-ah a tel leh bawk.