Aizawl: MPCC Treasurer Dr Lalmalsawma Nghaka chuan tunah hian tui let hnua Mizoramin kawngpui chhiat ber hun a tawng mek tih a sawi.
Inrinni khan MPCC Treasurer hian Sihphir leh Lungdai inkar kawngpui dinhmun enfiahin a tlawh a. He khawpui hi kumin thal chhungin siam thar vek ni mah se, thla thum/li lek hnuah tlan ngaihna awm lo khawpin a chhe leh hman tih a sawi.
Lalmalsawma Nghaka chuan, “Kum 15 daih kawng kan siam dawn tia mipui hmaa intiamtute sorkarna hnuaiah Aizawl khawpui chhung kawng a ni emaw, khaw kar kawng, a khawi a mah hi fur khat daih an awm ta mang lo hi a vanduaithlak hle a ni,” a ti.
MPCC Treasurer chuan nikum September thla atang khan sorkarin mipui ip atangin kawng siamna tur chhiah (cess) tih luihna in an la a, tunah hian kawng siam nan tuialhthei chhiah a lak tling khawm chu Rs nuai 2,300 dawn a ni tawh a. Kawngpui siamna atana lak tur ti siin vawiina kawngpui dinhmun chu a chhe hle tih a sawi.
ZPM sorkarin an mawhphurhna, a fawng vuantu an ni tih inhai tawh lovin NHIDCL, BRO, leh contractor te mawhpuh tum zel tawh lo se a duh tih sawiin Dr Lalmalsawma Nghaka chuan, “Lungdai, Serkhan, Zanlawn leh Bukpui tlangdungten awlsam taka an thlai tharte Aizawl Bazarah an hralh thin chu kawngpui chhiat avanga an thlai tharte Aizawl Bazara an hralhnaah harsatna an tawk mek a. Hei mai ni lovin, zin veivak leh lirtheia eizawng ten nasa takin harsatna an tawk mek a, a bik takin dam lo inphur te tan phei chuan a manganthlak lehzual hle a ni,” a ti bawk.