Inthlan hma leh inthlan hnu thlengin, parliament-ah neutral-a awm tur leh issue base-a NDA emaw, INDIA emaw, tangrual pawlte thlawp tura lo insawi tawh, rorel lai, ZPM chu tun hnaia NDA Floor Leaders’ meeting-a Mizoram Lok Sabha MP Richard Vanlalhmangaiha a tel avangin an dinhmun an thlak danglam nia ngaihna a lian hle.
Ningani khan Delhi-a Parliament House Committee Room-ah NDA Floor Leaders meeting neih a ni. He thutkhawmah hian India Vice President thlanna lo awm tura NDA-in common candidate neih chungchang chiah agenda rel a ni a, candidate intawm neih an rem ti nghe nghe.
NDA Floor Leaders’ meeting-ah hian union minister pali – Defence Minister Rajnat Singh, Home Minister Amit Shah, Parliamentary Affairs Minister Kiren Rijiju leh Health Minister/Rajya Sabha leader/BJP President JP Nadda ten an telpui bakah, NDA-a tel party tinte atangin MP pakhat zel an tel a ni.
Hetih lai hian NDA-a inziak lut lo party-te tel phal a nih ngai loh laiin Mizoram Lok Sabha MP Richard Vanlalhmangaiha a tel ve nia thudawn a ni.
NDA an zawm leh zawm loh chungchangah ZPM President Lalliansawta chuan, “NDA zawm leh zawm loh chungchangah party ang chuan tun hnaiah engmah kan sawi thar lo. Kan dinna ngaiah kan la ding reng. Amaherawhchu, politics a ni a, tel hunte hi a awm ang em aw?” tiin The Zozam Times zawhna a chhang.
Zirtawpni kaltaa Congress Bhavan-a MPCC Political Session neihah MPCC President Lal Thanzara chuan ZPM sorkarin BJP a zawm tan nia puhin, “August 7 khan NDA, BJP leh a thawhpuite chuan meeting an nei a, hemi tum hian Lok Sabha MP Richard Vanlalhmangaiha chu a tel ve a, enchhin sorkar hian BJP a zawm tan niin a lang,” a ti a. ZPM hian kum 2023 MLA inthlanah BJP sum an hmang nasa nia sawi a awm thu leh Lok Sabha speaker thlanah pawh BJP vote tawhah a puh bawk.