Aizawl: MNF General Secretary Er Lalrinawma chuan Mizoram leh hnam himna turin MNF party hi a sulsutu niin, mawhphurhna huai taka a lak thin angin, a awmna apiangah tlanchhe lovin a la mek zel tih a sawi.
Thawhtannia Mizo Hnam Run chhung inkhawm hun hnuhna, political session-ah MNF General Secretary Er Lalrinawma chuan, “Pathianin hnama min dinna chhawm nung tur leh tungding zel tura khawvel hriat thama sul lo sutu leh thih huama inpe, Hnam pa Pu Laldenga leh kan hruaitu hmasate, hnam pasaltha te kha vawiina Mizoram tan hian an hlu tak zet a. An hlutna hi thangtharten kan la hmuh belh deuh deuh dawn a ni,” a ti.
Minister hlui, Er Lalrinawma chuan, khawvelah humhalh loh hnam leh tawng tam tak a bo tawh a, a bo mek zel a, chutiang laka an himna tura chi nung tuhtu, Laldenga leh a hnungzuitute chi tuh Mizo Nationalism hi a duah chho zel dawn a. Chumi chhawmnun hna thawh chu tuna thangtharte hna pawimawh berte zinga mi an ni tih a sawi.
“Pathianin chenna tur ram min pe a, hnamah min siam a, chuvangin kan hnam ziarang te hi kan hnualsuat tur a ni lo,” tiin Er Lalrinawma chuan, hmasawnna hi a tul rualin, hnam phumbo zawnga hmasawn a hlauhawm em em a. Mizoram ram leh hnam himna turin MNF party hi a sulsutu niin mawhphurhna huai takin a lak thin angin, a awmna apiangah tlanchhe lovin a la mek zel tih a sawi.