Kum 2004 a tihchhuah Mel Gibson-a movie siam The Passion of the Christ chu a chhunzawmna siam a ni leh dawn ta.
He thu hi August ni 5 khan tarlan niin, kum 2027 March ni 26 a tihchhuah tura ruahmanna kalpui mek a nih thu sawi a ni a, good friday ni tak a ni dawn bawk nia sawi a ni.
Passion of the Christ sequel-ah hian Isua thawhlehna lampang bik deuh an tarlang dawn niin film siamtu Gibson chuan a sawi a, Pathian fapa thihna leh thawhlehna mai bakah a thiltih ropui tak tak hmuh tur a awm dawn niin a sawi.
Kum 69 mi Mel Gibson hian The Passion of the Christ hlawhtling taka a siam hnu khan a chhunzawmna siam tura nawrna a dawn nasat thu a sawi a, mahse a hautak em avangin a ngaihtuahnaah a awm mai theih loh thu sawiin, kum 2022 April thla vel atang khan siam ngei tuma hma a lak chhunzawm leh tak thu leh ruahmanna pawh a siam leh chauh thu a sawi bawk.
Mel Gibson sawi danin, a hmasa lama changtu zingah Isua lema chang Jim Caviesel leh Mary Magdalene lama chang Monica Bellucci te chu an lang nawn leh ngei dawn a, Isua nu lema chang Maia Morgenstern leh Petera lema chang Francesco De Vito te pawhin an team an zawm leh thei dawn tih a sawi.
The Resurrection of the Christ tia movie hming vuah tur hi part 1 leh part 2 a then tur niin, part 1 hi March 26,2027 a chhuah tanin, part 2 hi May 6,2027 a chhuah tan tum a nih thu film siamtu Mel Gibson chuan a sawi bawk.