Aizawl: Mizoram Youth Commission (MYC) Chairman Malsawmzuala Ralte chuan ram pawna Mizo thalai hnathawkte hlawh hian Mizoram chhunga sum che vel pawh a nghawng pha a, an sum lak luh tipungtu pakhat an nih thu a sawi.
ZPM-in nimina an party pisa-a chhung inkhawm an neihah MYC Chairman Malsawmzuala Ralte chuan, sorkar kum liam ta chhung khan Mizo thalai 114 zetin India ram hmun hrang hrang hotel changkangah hna hmuin an thawk mek a. Kuminah dilna hawn leh niin, tunah hian training lai 70 an awm mek a. Ruahman anga thil a kal tluan chuan India ram hotel thaho bakah foreign hotel liante pawhin an rawn interview ve dawn tih a sawi.
MYC Chairman chuan kumin financial year chhung hian Hotel Management Training seat 200 an nei a; tunah hian Lunglei leh Champhai Youth Centre-ah batch khat ve ve training turin ruahmanna peih fel ni tawh tih a sawi a. India ram hmun hrang hranga hotel nei, The Lalit te nen thawhhona thuthlung ziah a ni a, Spa therapist training tur an la a, an hotel-a thawk zui nghal tur nikum chhung khan Mizo nula 15 chu an tir chhuak tawh tih a sawi bawk.
MYC-in a theih ang angin Corporate Social Responsibilty (CSR) a dap kual a, State Bank of India in Rs nuai 25 man Bus a pe tawh a, Honda company-in Rs 14,26,10-in an pui tawh a. Mizoram Rural Bank-in computer 20 set, dawhkan leh chair set 20 ve ve an pe dawn tih sawiin Malsawmzuala Ralte chuan, “MYC kal tlang hian Mizo thalai 170 zetin, kum 2024-2025 chhungin hna an hmu tawh a, ram pawna hna thawkte hlawh hian Mizoram chhunga sum che vel pawh a nghawng pha a, kan sum lak luh tipungtu pakhat a ni,” a ti.